لە مانگێکدا عێراق بە بەهای زیاتر لە ملیارێک دۆلار کاڵای لە تورکیاوە هاوردە کردووە

ئاڤا نیوز

 

تەنیا لە یەک مانگدا عێراق بە بەهای زیاتر لە ملیارێک دۆلار کاڵای لە تورکیاوە هاوردە کردووە، بە جۆرێک لە پلەی چوارەمی ئەو وڵاتانە دێت کە زۆرترین کاڵای لە تورکیاوە هاوردە کردووە.

 

وێنە گەورەکە: عێراق بۆ پڕکردنەوەی بەشێکی زۆر پێداویستییە ناوخۆیییەکانی پشت بە کاڵای تورکی دەبەستێت، ساڵانە بە بڕی دەیان ملیۆن دۆلار کاڵای جۆراوجۆر لەو وڵاتەوە هاوردە دەکات.

 

زانیاریی بەدەستهاتوو: بەپێی ڕاپۆرتێکی دەستەی ئاماری تورکیا  لەنێوان مانگی یەک بۆ نۆی ئەمساڵ 2024، بەراورد بە هەمان ماوە لە ساڵی ڕابردوو ڕێژەی هەناردەکردنیان بۆ 3.2٪ بەرزبووەتەوە، بە جۆرێک گەیشتووەتە 192 ملیار و 764 ملیۆن دۆلار، هاوکات لە هەمان ماوە هاوردەکردن بە ڕێژەی 8.0٪ی دابەزیوە، بە بەهای 252 ملیار و 638 ملیۆن دۆلار.

 

زانیاریی زیاتر: هەر بەپێی ڕاپۆرتەکە، ئەڵمانیا وڵاتی سەرەکییە لە هەناردەکردن بە بەهای ملیارێک و 680 ملیۆن دۆلار، لە دوای ئەو بەریتانیا دێت بە بەهای ملیارێک و 400 ملیۆن دۆلار. عێراقیش لە پلەی چوارم دێت بە بەهای ملیارێک و 133 ملیۆن دۆلار.

 

ئەوەی پێویستە بیزانیت: عێراق لە ئوردن، تورکیا، ئێران، سعودیە، ئیمارات، چین، هیندستان، ژاپۆن، بەرازیل، ئەمریکا و ژمارەیەک وڵاتانی ئەوروپی. کاڵای جۆراوجۆر هاوردە دەکات.
 

ئەمەش بزانە: بەگوێرەی کۆمپانیای “Stastista” کە کۆمپانیایەکی ئەڵمانییە و تایبەتە بە بازاڕی جیهانی و داتاکانی بەکاربەر، عێراق لە ساڵی 2023 بە بەهای زیاتر لە 95 ملیار دۆلار کاڵا و کەلوپەلی هاوردە کردووە.