عەلی خامنەیی هەڕەشە لە ئەمریکا و ئیسرائیل دەکات؛ وەڵامی تووندمان دەبێت

ئاڤا نیوز

ڕێبەری باڵای کۆماری ئیسلامیی ئێران پەیامێکی هەڕەشەئامێز بۆ ئەمریکا و ئیسرائیل دەنێرێت و دەڵێت: "بەدڵنیاییەوە وەڵامی تووندمان دەبێت".

وێنە گەورەکە: گرژییەکانی نێوان ئێران و ئیسرائیل تادێت زیاتر دەبێت، سەرچاوەکان ئاماژە بۆ ئەوە دەکەن پێش هەڵبژاردنی سەرۆکایەتیی ئەمریکا کە ڕۆژی سێشەممە 5-11-2024 دەکرێت، واتە لە دوو ڕۆژی داهاتوودا ئێران وەڵامی هێرشەکەی ئیسرائیل دەداتەوە.

 

لێدوانی فەرمی: عەلی خامنەیی، ڕێبەری باڵای کۆماری ئیسلامیی ئێران ڕایگەیاند: ''دووژمنان چ ئەمریکا بێت یاخود ئیسرائیل دەبێت لەوە دڵنیابن کە وەڵامی تووندیان دەدەینەوە، بەرامبەر بەو کارەیان کە بە ئێران و بەرەی مقاومە دەیکەن''.
 

لەلایەکی دیکەوە: سەرچاوەیەکی باڵا بە سی ئێن ئێنی ئەمریکی ڕاگەیاندووە، ئێران پێش دەستپێکردنی هەڵبژاردنی سەرۆکایەتیی ئەمریکا پلانی هەیە وەڵامی هێرشەکەی ئیسرائیل بداتەوە. 

باکگراوند: دوای هێرشە مووشەکییەکەی بۆ سەر ئیسرائیل لە ڕێکەوتی 1-10-2024، ئێران هەڕەشەی ئەوەی کرد ئەگەر ئسیرائیل وەڵامی بداتەوە دیسان هێرشی دەکاتەوە سەر، بەڵام ئیسرائیل سەرەڕای 26 ڕۆژ بێدەنگی، گوێی بە هەڕەشەکانی ئێران نەدا و بە فڕۆکەی جەنگی چەند بنکەیەکی سەربازیی ئێرانی لە پارێزگاکانی تاران، ئیلام و خوزستان بۆردوومان کرد، بەهۆیەوە چوار سەربازی ئێرانی کوژران.