کۆمیسیۆن ئاماری تانەکانی هەڵبژاردنی پەرلەمانی کوردستان بڵاودەکاتەوە

ئاڤا نیوز
 
وادەی پێشکەشکردنی تانەی لایەنەکان لەبارەی هەڵبژاردنی پەرلەمانی کوردستان کۆتاییهات و 41 تانە لەسەر هەڵبژاردنەکە تۆمارکراون، زۆرترین ژمارەی تانەکانیش لە پارێزگاکانی سلێمانی و هەولێر بوون.

 

وێنە گەورەکە: 20ی تشرینی یەکەمی ئەمساڵ هەڵبژاردنی پەرلەمانی کوردستان بەڕێوەچوو و 30ی هەمان مانگیش ئەنجامی کۆتایی ڕاگەیێنران، بەشێک لە لایەنەکان لە ڕێکارەکانی کۆمیسیۆن و ئەو دەرئەنجامانە ناڕازیی بوون کە بەدەستیان هێنابوون.

 

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق بڵاویکردەوە، کاتژمێر 3:00ی دوانیوەڕۆی ئەمڕۆ یەکشەممە، وادەی پێشکەشکردنی تانەی لایەنەکان لەسەر هەڵبژاردنی پەرلەمانی کوردستان کۆتاییهات، لایەنەکانیش 41 تانەیان لەسەر هەڵبژاردنەکە پێشکەشکردووە.

 

وەک کۆمیسیۆن بڵاویکردووەتەوە، دابەشبوونی تانەی لایەنەکان بەگوێرەی پارێزگاکان بەم شێوەیەیە:

سلێمانی 25 تانە 
هەولێر 12 تانە 
هەڵەبجە 1 تانە 
دهۆک 3 تانە

زانیاریی زیاتر: بەگوێرەی یاسای کۆمیسیۆنی هەڵبژاردنەکانی عێراق، کۆمیسیۆن حەوت ڕۆژی لەبەردەم دایە تا وەڵامی خۆی لەبارەی تانەکان ئامادە بکات و ئاراستەی دەستەی دادوەری هەڵبژاردنەکانی دەکات، دەستەی دادوەری هەڵبژاردنەکانیش لە ماوەی 10 ڕۆژدا کۆتا بڕیاری خۆی لەسەر سکاڵاکان دەدات، دواتریش ئەنجوومەنی کۆمیسیارانی کۆمیسیۆن لە کۆبوونەوەیەکدا بە فەرمی ئەنجامی کۆتایی هەڵبژاردنەکان پەسەند و بڵاودەکاتەوە.