مەغریب داوای قەرەبووکردنەوە لە عێراق دەکات

ئاڤا نیوز

 

شانشینی مەغریب لەسەر دۆسیەیەکی 43 ساڵ لەمەوبەری تایبەت بە جووتیارانی وڵاتەکەی کە لە عێراق کاریانکردووە، داوای قەرەبووکردنەوە لە بەغدا دەکات.

 

وێنە گەورەکە: ساڵی 1981 عێراق و مەغریب ڕێککەوتنێکیان واژۆکردووە بۆ سوود وەرگرتن لە توانای جووتیارانی مەغریب و نیشتەجێکردنیان لە عێراق، بەجۆرێک لەبەرامبەر گۆڕینی 10 هێکتار زەوی بۆ زەوییەکی بەپیتی کشتوکاڵی، حکومەتی ئەو کاتەی عێراق ڕێگەیدا بوو جووتیارەکان بەخێزانەوە بێنە وڵاتەکە، دوای 10 ساڵ مانەوەشیان ئەو ماڵەی پێیاندرابوو، بەناویانەوە دەکرا لەگەڵ دەیان لێخۆشبوون و پاداشتی دیکە.

 

چیرۆکی سەرەکی: هەردوو شەڕی یەکەم و دووەمی کەنداو، جووتیارە مەغریبییەکانی ناچارکرد عێراق بەرەو وڵاتی خۆیان جێبهێڵن، ئێستا دوای 43 ساڵ و لەسەر داوای جووتیارەکان، حکومەتی مەغریب دۆسیەی قەرەبووکردنەوەی ئەو جووتیارانەی زیندووکردووەتەوە و لەگەڵ عێراقدا باسی کردووە.

 

زانیاریی زیاتر: بەگوێرەی وەزارەتی دەرەوەی مەغریب: وەڵامی دەسەڵاتدارانی عێراق بۆ دۆسییەکە ئەرێنی بووە و لیژنەیەکی هاوبەش لەنێوان هەردوولادا بۆ چارەسەری ئەو کێشەیە پێکهێنراوە.

 

ڕاگەیێنراوی فەرمی: عەبدوڵڵا بوانو، ئەندامی پەرلەمانی مەغریب لەوبارەیەوە ڕایگەیاند: سەدان جووتیاری مەغریبیی لە هەشتاکانی سەدەی ڕابردوو بەهۆی شەڕەوە عێراقیان جێهێشتووە و زیانمەندبوون، بۆیەش وەک پەرلەمانتارانی مەغریب داوایان لە حکومەتی وڵاتەکەیان کردووە، لەگەڵ حکومەتی عێراق ئەو بابەتە باس بکات و داوای قەرەبووکردنەوەیان بکات.