تاقیگەی زیرەکی دەستکرد و ئینتەرنێت لە سەرجەم قوتابخانەکانی عێراق دادەنرێت

ئاڤا نیوز

لەسەر ڕاسپاردەی سەرۆکوەزیرانی عێراق تاقیگەی زیرەکی دەستکرد و ئینتەرنێت لە سەرجەم قوتابخانەکانی عێراق دادەنرێت.

 

چیرۆکی سەرەکی: یەکشەممە 3-11-2024، محەممەد شیاع سوودانی، سەرۆکوەزیرانی عێراق سەرۆکایەتیی کۆبوونەوەی دووەمی لیژنەی باڵای زیرەکی دەستکردی کرد.

 

وێنە گەورەکە: زیرەکی دەستکرد لقێکی زانستی کۆمپیتەرە و ئامانجی سەرەکی بریتییە لە بەرهەمهێنانی ئامێری زیرەک کە توانای ئەنجامدانی ئەو ئەرکانەیان هەبێت، کە پێویستی بە زیرەکی مرۆڤ هەیە. وڵاتی چین گەورەترین پێشەنگی بواری زیرەکی دەستکردە.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: سەرۆکوەزیران ڕەزامەندی لەسەر دەستپێشخەرییەک پیشانداوە بۆ ڕاکێشانی بەهرەمەندان لە کەرتی حکومی و تایبەت بۆ پەرەپێدانی تواناکانیان لە بواری زیرەکی دەستکرد لەژێر چاودێری شارەزایانی نێودەوڵەتی.

 

بابەتە ستراتیژییەكان: سەرۆکوەزیران لە وردەکاری و پێشنیازەکانی پەیوەست بە هێنانە ناوەوەی کۆمپیوتەر و زیرەکی دەستکرد بۆ ناو پرۆگرامەکانی وەزارەتی پەروەردە لە ساڵی خوێندنی داهاتوودا ئاگادارکرایەوە. جەختی لە بوونی  شاشەیەکی زیرەک و هێڵی ئینتەرنێت بۆ دامەزراندنی تاقیگەیەکی تایبەت بە زیرەکی دەستکرد لە هەموو قوتابخانەیەک کردەوە.