بردنەوەی کامالا هاریس یان دۆناڵد ترەمپ بۆ کورد باشترە؟

ئاڤا نیوز 

 

سبەی بە کاتی ئەمریکا بڕیارە هەڵبژاردنی سەرۆکایەتیی ئەمریکا بەڕێوەبچێت و سەرۆکی داهاتووی ئەمریکا دیاریی دەکرێت.

 

وێنە گەورەکە: هەڵبژاردنەکانی ئەمریکا و سەرۆکێکی نوێ کاریگەری لەسەر هەموو جیهان و ڕۆژهەڵاتی ناوەڕاست و هەر چوارپارچەی کوردستان دادەنێت. جیاوازی سیاسەتی دیموکرات و کۆمارییەکان کاریگەرییەکانیان جیاوازە.

 

لێدوانی فەرمی: د. کارۆخ خۆشناو، سەرۆکی ئینیستیوتی توێژینەوەی ئەمریکی – کوردی، لە بەرنامەی نان و چای ئاڤا میدیادا باسی لە هەڵبژاردنەکانی ئەمریکا و کاریگەرییەکانی لەسەر دۆزی کورد لە هەر چوارپارچەی کوردستان کرد و وتی، ترەمپ و کەمالا سیاسەتی جیاواز بەکاردەهێنن و کاریگەریی جیاوازییان هەیە لەسەر ڕۆژهەڵاتی ناوەڕاست و کوردستان.

 

سەبارەت بە هەرێمی کوردستان باسی لەوەش کرد، کامالا و ترەمپ هەر یەکێک لەوانە لە دەسەڵات بن مامەڵەیەکی دەستووریمان لەگەڵ دەکەن لەبەر ئەوەی ئێمە هەرێمێکی یاسایی و دەستوورین.    

 

لەلایەکی ترەوە: دەربارەی کوردانی ڕۆژهەڵات دەڵێت، ترەمپ هەڵبژاردەیەکی باشە چونکە سیاسەتێکی توند لەگەڵ ئێران بەکاردەهێنێت.

 

سەبارەت بە کوردانی باکووری کوردستان د. کارۆخ خۆشناو ئاماژەی بەوەدا؛ بۆ کوردانی باکوور و ڕۆژئاوا کامالا هاریس باشترە کە سیاسەتی بایدن بەکاردەهێنێت، نابێت بیرمان بچێت کە ترەمپ دۆستایەتییەکی نزیکی لەگەڵ ئەردۆغاندا هەیە.