هەنگاو بۆ دامەزراندنی یەکەمەکانی زانکۆ و بەهەمیشەییکردنی فەرمانبەرانی گرێبەست دەنرێت

ئاڤا نیوز

 

حکومەتی هەرێمی کوردستان بۆ بابەتی دامەزراندنی سێ یەکەمەکانی زانکۆ و پەیمانگەکان  و بەهەمیشەییکردنی فەرمانبەرانی گرێبەست لە بەغدا هەنگاو دەنێت و داوای کۆبوونەوە لە تەیف سامی، وەزیری دارایی عێراق دەکات.

 

نووسراوی فەرمی: د.ئومێد سەباح، سەرۆکی دیوانی ئەنجوومەنی وەزیران، چوار ڕۆژ پێش ئێستا واتە ڕۆژی 31-10-2024، نووسراوێکی بۆ نوێنەرایەتیی حکومەتی هەرێمی کوردستان لە بە‌غدا کردووە و داوای کردووە چاوپێکەوتنێک لەگەڵ  تەیف سامی، وەزیری دارایی عێراق ڕێکبخەن لەبارەی تاوتێکردنی ڕێکارەکانی بڕیارەکانی 264 و 265ی ئەنجوومەنی وەزیرانی هەرێمی کوردستان کە لە کۆبوونەوەی 25-9-2024 دەرکراون.

 

ئەوەی پێویستە بیزانیت:  بڕیاری ژمارە 264ی ئەنجوومەنی وەزیرانی هەرێمی کوردستان تایبەت بوو بە هەمیشەییکردنی فەرمانبەرانی گرێبەست، هەروەها بڕیاری 265 تایبەت بوو بە دامەزراندی دەرچووانی سێ یەکەمەکانی زانکۆ و پەیمانگاکان و هەڵگرانی بڕوانامە باڵاکان و ئەوانەی کە یاسای پلەبەندی خاوەن پیشەی تەندروستی و پزیشکی دەیانگرێتەوە، ئەوکات داوا لە بەغدا کرا پلەی وەزیفیی پێویست و تەرخانکراوی داراییان بۆ دابین بکات.

دەقی نووسراوەکەی حکومەتی هەرێمی کوردستان