ئیسرائیل چەند ئامانجێک لە عێراق بۆ لێدان دەستنیشان دەکات

ئاڤا نیوز

"ئامانجەكانمان لە عێراق دیاریكردوون بۆ لێدان" ئەمە هۆشداری و زەنگێکی نوێی ئیسرائیلە بۆ عێراقییەکان.

وێنە گەورەکە: تادێت ئاڵۆزییەکانی ناوچەکە زیاتر دەبن و بەهۆی هێرشەکانی گرووپە چەکدارەکانی عێراقیش بۆ سەر ئیسرائیل، هەڕەشەکانی ئەو وڵاتە بۆ وەڵامدانەوە زیاتر دەبن.

بڵاوکراوەی فەرمی: ڕۆژنامەی تایمز ئۆف ئیسرائیل بڵاوی كردووەتەوە، ئیسرائیل هۆشداری داوە بە بەغدا لە بەكارهێنانی خاكی عێراق لەلایەن گروپە چەكدارە پاڵپشتیكراوەكانی ئێرانەوە بۆ هێرشكردنە سەر ئیسرائیل.

مەترسییە زانراوەکان: بەپێی ڕۆژنامەکە، ئیسرائیل ئامانجەكانی لە عێراق دیاری كردووە، ئەگەر ئەو گرووپانە بەردەوام بن لە هێرشەکانیان، ئەویش هێرش دەکاتە سەریان.

ئەوەی پێشبینی دەکرێت: چاوەڕوان دەکرێت ئێران وەڵامی هێرشەکەی ئیسرائیل بداتەوە، بەڵام ڕاستەوخۆ نا، بەڵکو ئەمجارە لەڕێگەی عێراقەوە هێرش بکاتە سەر ئیسرائیل. هەر بەپێی ڕۆژنامەکە مانگە دەستكردەكان چاودێری ئەوەیان كردووە، تاران مووشەکی بۆ عێراق گواستووەتەوە، بۆ بەكارهێنانی لە هێرشە چاوەڕوانكراوەكەی بۆ سەر ئیسرائیل.

لەلایەکی دیکەوە: گرووپە چەکدارەکانی سەر بە ئێران لە عێراق، بڕیاریان داوە هێرشەکانیان بۆ سەر ئیسرائیل فراوانتر بکەن، ئەو وڵاتەش چەندینجارە هۆشدارییەکانی دووبارە دەکاتەوە. ئەگەر ئێران خاکی عێراق بۆ هێرشکردن بەکاربێنێت، ئەوا هیچ دوور نییە ئەم وڵاتە بخزێتە ناو جەنگێکەوە کە ئێستا ‌غەززە و لوبنان تێیدا دەسووتێن.