105 هەزار پارچە زەوی دیکە بۆ دابەشکردن ئامادە دەکرێن

ئاڤا نیوز

 

پڕۆسەی دابەشکردنی زەوی لە هەرێمی کوردستان بەردەوامە و  105 هەزار پارچە زەوی دیکە ئامادە کراوە، لەم هەفتەیەدا تیروپشک بۆ بەشێکیان دەکرێت.

 

وێنە گەورەکە: پرۆسەی دابەشکردنی زەوی ماوەیەکە دەستیپێکردووە، بەگشتی زیاتر لە 200 هەزار فەرمانبەر و خانەنشین لە وەرگرتنی زەوی سوودمەند دەبن، تاوەکو ئێستا نزیکەی 12 هەزار کەس وەریان گرتووە. 

 

لێدوانی فەرمی: کارزان هادی، سەرۆکی شارەوانی هەولێر بە ئاڤا میدیای ڕاگەیاند: پێنج هەزار پارچە زەوی  ئامادەن، کارتیان بۆ کراوە و ڕەزامەندی لەسەر ناوەکان دراوە. دەڵێت: لەو ژمارەیە دا سێ هەزار پارچە زەوی لە ناو هەولێرن و چوارشەممە و  پێنجشەممەی ئەم هەفتەیە تیروپشکیان بۆ دەکرێت. دوو هەزارەکەی دیکەش لە سنووری شارەوانییەکانی دیکەی هەولێرن و دواتر تیروپشک بۆ ئەوانیش دەکرێت.

 

لەلایەکی دیکەوە: زەردەشت ڕەفیق، گوتەبێژی شارەوانی سلێمانی بۆ ئاڤا میدیا گوتی، ناوی شەش هەزار فەرمانبەری بەڕێوەبەرایەتی کارەبا و وەزارەتی کار پەسەندکراوە و لە ئایندەیەکی نزیک تیروپشکیان بۆ دەکرێت.

 

زانیاریی زیاتر: لە سلێمانی لە قۆناغی یەکەمدا هەزار و 600 فەرمانبەر زەوییان وەرگرتووە.

 

گۆشەیەکی دیکە: دیار بەحری، بەڕێوەبەری ‌گشتیی شارەوانییەکانی دهۆک دەڵێت: 49 هەزار پارچە زەوی ئامادەکراون، هەفتەی داهاتوو تیروپشک بۆ دابەشکردنی هەزار پارچە زەوی دەکرێت.

 

ئەوەی پێویستە بیزانیت: ئێستا 105 هەزار پارچە زەوی ئامادەکراون، لەو ژمارەیە بەشێکیان سەرجەم ڕێکارەکانیان تەواوکراون و کارتیان بۆ کراوە، ئەم هەفتەیە تیروپشک بۆ بەشێکی ناوەکان دەکرێت و هەفتەی داهاتووش بۆ بەشەکەی تر.

 

ئەمەش بزانە: پڕۆسەی دابەشکردنی زەوی لە پارێزگاکان و ئیدارە سەربەخۆ و قەزاکان بەردەوامە و قۆناغ بە قۆناغ زەوی بەسەر فەرمانبەران و خانەنشینان دابەش دەکرێ، هەر کەسێک مەرجەکانی تێدا بێت و پێشتر سوودمەند نەبووبێت زەوی وەردەگرێت.