مانگی ڕابردوو پێنج ژن لە ئێران لەسێدارە دراون

ئاڤا نیوز

 

مانگی ڕابردوو لە ئێران، شەش چالاکی ژن دەستبەسەر کراون و 24ـی دیکەش سزای زیندانیکردنیان بەسەردا سەپێنراوە، هەروەها 10 حاڵەتی ژنکوژی و پێنج لە سێدارەدانی ژن تۆمار کراوە.

 

وێنە گەورەکە: لە دوای خۆپیشاندانەکانی ئێران لەژێر درووشمی "ژن ژیان ئازادی" گوشارەکان لەسەر چالاکانی ژن زیاتر بووە، ئەمەش ناڕەزایەتیی ڕێکخراوەکانی ژنان و کۆمەڵگەی نێودەوڵەتیی بەدوای خۆیدا هێناوە.

 

ڕاپۆرتی فەرمی: ڕێکخراوی هەنگاو بۆ مافەکانی مرۆڤ لە ڕاپۆرتێکدا دەڵێت: "لە مانگی ئۆکتۆبەری ڕابردوودا پێنج ژن بە تۆمەتی جیاواز لە بەندیخانە جیاوازەکانی ئێراندا لە سێدارە دراون و ئەمەش دەکاتە ڕێژەی 3٪ـی کۆی حاڵەتی لەسێدارەدراوەکان لەو مانگەدا".

زانیاریی زیاتر: هەر بەپێی ڕاپۆرتی هەنگاو، هەر بە تۆمەتی جیاواز شەش چالاکی ژن لە شارە جیاوازەکانی ئێران دەستبەسەر کراون، لانیکەم 24 چالاکوانی ژن لە شارە جیاوازەکانی ئێران سزای زیندانیکردنیان بەسەردا سەپێنراوە، بەگشتیش نۆ لەو ژنانە کورد بوون.

 

لەلایەکی دیکەوە: 10 ژن بە شێواز و ڕووداوی جیاواز کوژراون، کە بەشێکیان لەلایەن کەسوکاریانەوە بووە.

 

ئەمەش بزانە: هەر لە مانگی ڕابردوودا، 161 زیندانی لە بەندیخانەکانی ئێران لەسێدارە دراون.