مووچەی مانگی 10ی مووچەخۆرانی هەرێمی کوردستان خەرج دەکرێت

ئاڤا نیوز

دوو ڕۆژە وردبینی لە لیستی مووچەی مانگی 10ی مووچەخۆرانی هەرێمی کوردستان دەستپێکردووە و دوای تەواوبوونی پڕۆسەکە دەست بە خەرجکردنی پارەکە دەکرێت.

 

وێنە گەورەکە: لەماوەی چەند ڕۆژی ڕابردوو شاندێکی وەزارەتی دارایی و ئابووری هەرێمی کوردستان سەردانی بەغدایان کرد، ئامانج لە سەردانەکەیان چارەسەرکردنی کێشە هونەرییەکانی بەردەم ناردنی مووچە بۆ مووچەخۆرانی هەرێمی کوردستانە، شاندەکە دووجار لیستی مووچەیان ڕادەستی وەزارەتی دارایی عێراق کردووە.

 

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤا نیوزی گوت، "وردبینی لە لیستی بەشێکی وەزارەتەکان تەواو بووە، ئەگەر پڕۆسەکە لەم هەفتەیە تەواو بێت، لە کۆتایی هەفتە دەست بە خەرجکردنی پارەکە دەکرێت ئەگەرنا دەکەوێتە هەفتەی داهاتوو."

 

ئەوەی پێویستە بیزانیت: حکومەتی هەرێمی کوردستان، بۆ دابەشکردنی مووچەی مانگی 10 پێویستی بە  996 ملیار دینارە، بڕیارە بە چەند گوژمەیەک ئەو بڕە پارەیە بنێردرێت.

 

لەلایەکی دیکەوە: یەکێک لە تێبینییەکانی وەزارەتی دارایی عێراق لەسەر 'میزان موراجەعەی' لیستی مووچەی مانگی نۆ بووە، کە ئەوەش لەلایەن وەزارەتی دارایی و ئابووری هەرێمی کوردستان چارەسەر کراوە.