مالیکی: پشتیوانی فەڵەستین و لوبنانین، بەڵام ئاسایشی عێراق گرنگە

ئاڤا نیوز

 

سەرۆکی هاوپەیمانی دەوڵەتی یاسا دەڵێت، هەرچەندە عێراق پشتیوانی لە دۆزی ڕەوای گەلانی فەڵەستین و لوبنان دەکات، بەڵام خواستی ئەوەشی هەیە دۆخی ئەمنیی و ئارامی عێراق و دۆخی ژیانی هاووڵاتیان پارێزراو بێت و باشتریش بکرێت.

 

وێنە گەورەکە: دوای پەیامەکەی عەلی سیستانی، مەرجەعی باڵای شیعەکانی عێراق، زۆرینەی لایەنەکانی وڵاتەکە داوای دوورخستنەوەی عێراق دەکەن لە ئاڵۆزییەکانی ناوچەکە و جەخت لە چارەسەری دیپلۆماسی کێشەکان دەکەنەوە.

 

ڕاگەیێنراوی فەرمی: نووری مالیکی، سەرۆکی هاوپەیمانی دەوڵەتی یاسا و سەرۆکوەزیرانی پێشووتری عێراق، لە کۆبوونەوەیدا لەگەڵ محەممەد ئەلحەسان، نوێنەری تایبەتی سکرتێری گشتیی نەتەوە یەکگرتووەکان لە عێراق (یونامی) ئاماژەی بەوەکرد، وڵاتەکەی پشتیوانی دۆزی ڕەوای فەڵەستین و لوبنانە، لە هەمان کاتیشدا هەموو لایەنە سیاسییەکان خواستی ئەوەیان هەیە دۆخی ئەمنیی و ئارامی عێراق و دۆخی ژیانی هاووڵاتیانیش باشتر بکرێت.

 

مالیکی داوا لە نەتەوە یەکگرتووەکانیش دەکات، بۆ ڕاگرتنی نەهامەتییەکانی هەردوو گەلی فەڵەستین و لوبنان ڕۆڵێکی کاریگەرتر بگێڕێت و هاوکاریی زیاتری ئاوارەکانیش بکات، بێدەنگی کۆمەڵگەی نێودەوڵەتیشی لەبەرامبەر کۆمەڵکوژییەکانی ئیسرائیل سەرکۆنە کرد.

 

لەلایەکی دیکەوە: نوێنەری سکرتێری گشتی نەتەوە یەکگرتووەکان لە عێراق گوتی: "ئومێدەوارم باشی پەیوەندیی نێوان نەتەوە یەکگرتووەکان و لایەنەکانی عێراق، هاوکاربێت بۆ سەرکەوتنی ئەو ئامانجانەی یونامی لە عێراق لەپێناویدا دامەزرێنراوە".