پۆستە ئیدارییەکانی پارێزگای نەینەوا یەکلایی دەکرێنەوە

ئاڤا نیوز

ئەنجوومەنی پارێزگای نەینەوا دەستی بە کۆبوونەوە کردووەتەوە و مانگی داهاتوو لە ئەگەری ڕێککەوتنی لایەنەکان، پۆستە ئیدارییەکان دابەش دەکرێن و بەشێکیان دەگۆڕدرێن.

وێنە گەورەکە: دوای پێنج مانگ لە بایکۆت، بەرەی نەینەوا لیئەهلیها کە پارتی بەشێکیەتی گەڕاوەتەوە بۆ کۆبوونەوەکانی ئەنجوومەنی پارێزگای نەینەوا  و لە سێ کۆبوونەوەی ڕابردوودا بەشدارییان کردووە، بۆ ئەوەی بەرەی نەینەوای موستەقبەل کە یەکێتی بەشێکی بەرەکەیە، بڕیار لەسەر گۆڕانکاری ژمارەیەک پۆستی ئیداری دیکە نەدات.

لێدوانی فەرمی: محەممەد جاسم، ئەندامی فراکسیۆنی یەکێتی لە ئەنجوومەنی پارێزگاکە بە ئاڤا نیوزی ڕاگەیاند: "شەش پۆستی ئیداری بۆ پارتی جێهێڵراون و لە ماوەی یەک مانگدا گۆڕانکارییەکان دەکرێن، هەر لایەنێک بەگوێرەی ڕێککەوتن و پێگەی لەنێو ئەنجوومەن پۆست وەردەگرێت."

بۆچوونی بەرامبەر: جەمال شەشۆ، ئەندامی فراکسیۆنی پارتی لە ئەنجوومەنی پارێزگای نەینەوا بە ئاڤا نیوزی گوت، "دابەشکردنی پۆستەکانی ئیدارەی نەینەوا پێویستی بە ڕێککەوتنی سیاسییە، کۆبوونەوەکەی مانگی تەمموزی ڕابردوو نایاسایی بووە، بۆ ئەوەی هەمان دۆخ دووبارە نەبێتەوە بایکۆتمان شکاندووە."

باکگراوند: ڕۆژی 02-07-2024 بەرەی نەینەوای موستەقبەل بەبێ ئامادەبوونی ئەندامانی بەرەی نەینەوا لیئەهلیها، گۆڕانکاری لە 21 پۆستی ئیداری پارێزگاکە کرد، ئەمەش ناڕەزایی بەرەی ئامادەنەبووی لێکەوتەوە و لە دادگەی ئیداری بەغدا سکاڵایان تۆماکرد و بۆ ماوەی پێنج مانگ بایکۆتی کۆبوونەوەکانیان کرد.