پووتین پیرۆزبایی لە ترەمپ دەكات و بە پیاوێكی ئازا وەسفی دەكات

ئاڤا نیوز

 

ڤلادیمێر پووتین، سەرۆكی ڕووسیا پیرۆزبایی لە دۆناڵد ترەمپ، سەرۆكی تازە هەڵبژێردراوی ئەمریكا دەكات، هاوکات ڕاشیدەگەیەنێت لێدوانەكانی ترەمپ لە ماوەی بانگەشەی هەڵبژاردن، شایانی سەرنجدان بوون، وەك ئاماژەیەك بۆ بەڵێنی ترەمپ لەبارەی وەستاندنی جەنگی نێوان ڕووسیا و ئۆكراینا لەماوەی کەمتر لە 24 کاتژمێردا.

 

وێنە گەورەكە: دوای سەركەوتنی دۆناڵد ترەمپ، لە هەڵبژاردن و بوونی بە 47ـەمین سەرۆكی ئەمریكا، لەلایەن سەرۆكی وڵاتانەوە پەیامی پیرۆزبایی ئاڕاستە دەكرێت و لە پەیامەكانیاندا، ئامادەیی گفتوگۆ و باشكردنی پەیوەندییەكانیان لەگەڵ ئەمریكا دووپاتدەكەنەوە.

ڕاگەیێنراوی فەرمی: بەگوێرەی هەواڵێكی (RT)ـی ڕووسی، ڤلادیمێر پووتین، سەرۆكی ڕووسیا، لە پەراوێزی بەشداریكردنی لە "كۆڕبەندی نێودەوڵەتیی ڤاڵدای بۆ گفتوگۆ"، جەختی لەوە كردووەتەوە، مۆسكۆ ئامادەیە كار لەگەڵ هەر سەرۆكێكدا بكات كە گەلی ئەمریكا متمانەی پێداوە، هاوكات سەرسامی خۆی بە ترەمپ دەربڕیوە و بە پیاوێكی ئازا وەسفی كردووە، كە سەرەڕای ئەوەی لە ماوەی ڕابردوو، هەراسان كراوە و هەوڵی تیرۆركردنی دراوە، كەچی كۆڵی نەداوە.

ئەوەی پێویستە بیزانیت: بەهۆی هەڵگیرسانی شەڕی نێوان ڕووسیا و ئۆكراینا، پشتیووانی بەردەوامی ئەمریكا و وڵاتانی ڕۆژئاوا بۆ كیێڤ، پەیوەندییەكانی نێوان مۆسكۆ و واشنتن لە ماوەی ڕابردوودا بەرەو ئاڵۆزی هەنگاوی ناوە. ترەمپ لە ماوەی بانگەشەی هەڵبژاردندا، بەڵێنی ڕاگرتنی جەنگی نێوان ڕووسیا و ئۆكراینای دا لە ماوەی كەمتر لە 24 كاتژمێر، ئەگەر هاتوو لە هەڵبژاردنەكان سەركەوتن بەدەستبهێنێت و ببێتە سەرۆكی داهاتووی ئەمریكا.