بەرەی تورکمانی: لە کەرکووک بە پۆستی قایمقام ڕازی نابین

ئاڤا نیوز

بڵاوبوونەوەی هەواڵی دابەشکردنی پۆستەکانی پارێزگای کەرکووک، بەرەی تورکمانی دەهێنێتە دەنگ و ڕەتیدەکاتەوە تەنها بە پۆستی قایمقام ڕازیبن.

چیرۆکی سەرەکی: ڕۆژی 21ی ئەم مانگە لایەنە براوەکانی کەرکووک لە هەڵبژاردنی ئەنجوومەنی پارێزگاکان، بەسەرپەرشتیی محەممەش شیاع سوودانی، سەرۆکوەزیرانی عێراق، هاوپەیمانێتیی ئیدارەی کەرکووکیان پێکهێنا و لەسەر چەند خاڵێک ڕێککەوتن.

زانیاریی تایبەت: ئاڤا نیوز زانیویەتی لە کۆبوونەوەکەدا پۆستی پارێزگاری کەرکووک بۆ کورد یەکلایی بووەتەوە، سەرۆکی ئەنجوومەنی پارێزگا بۆ عەرەب، بڕیاردەری ئەنجوومەن و قایمقامیش بۆ تورکمان. لەمەودوا پارێزگار دوو جێگری دەبێت، ئەگەر پارێزگار بۆ یەکێتی بێت، ئەوا جێگری یەکەمیان بۆ پارتی و جێگری دووەمیشیان بۆ عەرەب دەبێت.

لێدوانی فەرمی: ئەحمەد ڕەمزی، ئەندامی ئەنجوومەنی پارێزگای کەرکووک لە پشکی بەرەی تورکمانی، دابەشکردنی پۆستەکانی بەمشێوازە ڕەتکردەوە و بە ئاڤا نیوزی گوت: لە کۆبونەوەکانی داهاتوو لەگەڵ سوودانی ئەم پرسانە یەکلایی دەبنەوە. جەختیشی کردەوە زیاتر لە 30 هەزار دەنگیان هێناوە و بە پۆستی قایمقام ڕازی نابن.