ئێران داوا دەکات ترەمپ سیاسەتەکانی خولی یەکەمی سەرۆکایەتییەکەی بگۆڕێت

ئاڤا نیوز

 

ئێران داوا دەکات دۆناڵد ترەمپ، سەرۆکی هەڵبژێردراوی ئەمریکا، گۆڕانکاریی بە سیاسەتەکانیدا بکات و هاوشێوەی خولی یەکەمی سەرۆکایەتییەکەی پەیڕەوی لە سیاسەتی "ئەوپەڕی گوشار" لە سەر ئێران نەکات.

 

ڕاگەیێنراوی فەرمی: محەممەد جەواد زەریف، یاریدەدەری سەرۆککۆماری ئێران بۆ کاروباری ستراتیژی ڕایگەیاند "دەبێت ترەمپ ئەوە نیشان بدات کە لەسەر سیاسەتە هەڵەکانی پێشووی بەردەوام نابێت."

 

ئەوەی پێویستە بیزانیت: زەریف پێشتر وەزیری دەوەی ئێران بووە، لە سەردەمی ئەودا لە ساڵی 2015 ڕێککەوتنامەی ئەتۆمی لەنێوان ئەمریکا و ئێران واژۆ کرا، بەڵام دواتر ترەمپ هاتە سەر دەستەڵات و ساڵی 2018 بەشێوەیەکی یەکلایەنە ئەمریکای لە ڕێککەوتنەکە کشاندەوە و سزای زیاتری بەسەر ئێراندا سەپاند، لە بەرامبەریشدا ئێران چالاکییە ئەتۆمییەکانی زیاتر کردن و ئاستی پیتاندنی یۆرانیۆمی لە 3.5% ـەوە بۆ 60% بەرز کردەوە، واتە 30% کەمتر لەو ئاستەی کە بۆ بەکاربردنی وەک چەکی ئەتۆمی پێویستە. لەگەڵ ئەمەشدا تاران هەمیشە ئەوەی ڕەتکردووەتەوە کە بە دوای درووستکردنی چەکی ئەتۆمییەوە بێت.

 

ئەمەش بزانە: یەکێکی دیکە لەو کارانەی کە ترەمپ لە خولی یەکەمی سەرۆکایەتییەکەیدا بەرامبەر بە ئێران ئەنجامی دا، کوشتنی قاسم سولەیمانی، فەرماندەی سوپای قودسی ئێران بوو کە ساڵی 2020 لە بەغدا کردییە ئامانج.

 

لەلایەکی دیکەوە: ترەمپ پێشتر بە ڕۆژنامەنووسانی گوتبوو بە نیاز نییە زیان بە ئێران بگەیێنێت و مەرجەکانی ئەو ئاسانن کە بریتین لەوەی نابێت ئێران ببێتە خاوەن چەکی ئەتۆمی و دەشیەوێت ئێران ببێتە وڵاتێکی سەرکەوتوو.