زیاتر لە دوو هەزار حاڵەتی سکچوون لە شارەزوور تۆمار کراوە

ئاڤا نیوز

 

دوای هەوڵەکانی وەزارەتی تەندروستی و بەڕێوەبەرایەتییەکانی تەندروستی سلێمانی و شارەزوور، توانراوە چارەسەر بۆ توشوبووانی سکچوون بکرێت، وەزیری تەندروستیش لەوبارەیەوە دەڵێت "دوو ڕۆژی دیکە ئەنجامی زەرعی نەخۆشییەکە دەردەچێت".

 

چیرۆکی سەرەکی: چەند ڕۆژێکە نەخۆشی سکچوون لە قەزای شارەزوور بڵاوبووەتەوە، بەوهۆیەشەوە زیاتر لە دوو هەزار کەس بۆ وەرگرتنی چارەسەر ڕوویان لە نەخۆشخانەی شەهید ڕەئوف کردووە.

 

لێدوانی فەرمی: د.سامان بەرزنجی، وەزیری تەندروستی حکومەتی هەرێمی کوردستان، بە ئاڤا نیوزی گوت: پشکنینی سەرەتایی بۆ ئاوی خواردنەوە و پیسی نەخۆشەکان کراوە، دەرکەوتووە کە نەخۆشییەکە کۆلێرا نییە، بەهۆی هەوکردنی بەکتریاوە لە ئاوەکەدا بووە.

 

وەزیری تەندروستی دەڵێت: بەشێک لە نموونەکان زەرعی بۆ دەکرێت و لە دوو ڕۆژی داهاتوودا ئەنجامی زەرعی بەکتریاکەش دەردەچێت.

 

زانیاریی زیاتر: تاوەکو ئێستا دوو هەزار و 690 کەسی تووشبوو بە نەخۆشییەکە ناویان تۆمار کراوە، بۆ وەرگرتنی چارەسەر سەردانی نەخۆشخانەی شەهید ڕەئوفیان کردووە.

 

ئەوەی پێویستە بیزانیت: نەخۆشەکان باریان لە سوک بۆ مامناوەند بووە، بەڵام یەکێک لە نەخۆشەکان دۆخی تایبەت بووە و بۆ نەخۆشخانەکانی سلێمانی گواستراوەتەوە.

 

هۆکارە زانراوەکان: بەگوێرەی لێکۆڵینەوەکانی تیمەکانی وەزارەتی تەندروستی و بەڕێوەبەرایەتی گشتیی تەندروستی سلێمانی و شارەزوور، بەهۆی بارانبارینی ڕۆژانی ڕابردوو و خراپی سیستمی ئاو لەسنووری شارەزوور، ئاوی خواردنەوە و ئاوی پیس تێکەڵبوون، ئەوەش بووەتە هۆی دروستبوونی نەخۆشییەکە.