نیۆیۆرک تایمز: ئەمریکا دوای کوژرانی سینوار داوای لە قەتەر کردووە حەماس لە وڵاتەکەی دەربکات

ئاڤا نیوز

 

دوای ئەوەی قەتەر ئیسرائیل و حەماسی ئاگادار کردووە، تا "خواستێکی ڕاستگۆیانە و جدیان نەبێت بۆ ڕێککەوتن و دانووستان"، دەوحە ناتوانێت بەردەوام بێت لە نێوەندگیریکردن بۆ ئاگربەستی غەززە، لەئێستادا دەنگۆی جیاواز لە میدیاکانەوە لەبارەی بڕیارەکەی دەوحە هەیە.

 

زانیاریی بەدەستهاتوو: ڕۆژنامەی نیویۆرک تایمز پشتڕاستی کردووەتەوە، ئەمریکا لەسەر داوای ئیدارەی بایدن، ڕاستەوخۆ دوای کوژرانی یەحیا سینوار، سەرۆکی مەکتەبی سیاسی حەماس لە کەرتی غەززە داوای لە قەتەر کردووە حەماس لە وڵاتەکەی دەربکات.

 

بۆچوونی لایەنی بەرامبەر: حەماس هەموو ئەم دەنگۆیانە ڕەتدەکاتەوە کە باس لەوە دەکەن قەتەر داوای لە حەماس کرووە دەوحە بەجێبهێڵێت.

 

لەلایەکی دیکەوە: بەگوێرەی کەناڵی سی ئێن ئێنی ئەمریکی لەسەر داواکاریی ئەمریکا، قەتەر 10 ڕۆژ پێش ئێستا سەرکردە سیاسییەکانی بزووتنەوەی حەماسی لەم بڕیارە ئاگادارکردۆتەوە.

 

باکگراوند: دوای کوژرانی ئیسماعیل هەنیە سەرۆکی مەکتەب سیاسی حەماس لە تاران، یەحیا سینوار بووە سەرۆکی مەکتەب سیاسیی بزووتنەوە فەلەستینییەکە، بەڵام زۆر لە ڕابەرایەتیکردنی حەماس بەردەوام نەبوو و 17ـی ئۆکتۆبەری ئەمساڵ لەلایەن ئیسرائیلەوە لە غەززە کوژرا.