بەشێکی قوتابییانی ماستەر و دکتۆرا لەبەردەم وەزارەتی خوێندنی باڵا گردبوونەوە

ئاڤا نیوز

 

قوتابیانی خوێندنی باڵا لە گردبوونەوەیەک لەبەردەم وەزارەتی خوێندنی باڵا یاداشتێکیان ئاراستەی وەزارەتی خوێندنی باڵاو توێژینەوەی زانستی کرد و داوا دەکەن تاقیکردنەوەی کۆتایی توانستی زمانی ئینگلیزی لاببرێت. 

 

وێنە گەورەکە: وەزارەتی خوێندنی باڵا و توێژینەوەی زانستی لە ڕێگەی کۆمپانیایەکەوە سیستمێکی نوێی خوێندنی زمانی ئینگلیزی لە زانکۆکان پەیڕەو دەکات، ئەمەش ناڕەزایەتی سەدان قوتابی ماستەر و دکتۆرای لێ کەوتووەتەوە.

 

لێدوانی فەرمی: یەکێک لە قوتابییەکان بە ئاڤا نیوزی ڕاگەیاند: ئەو سیستەمەی بۆ تاقیکردنەوەی قوتابیانی خوێندنی ماستەر و دکتۆرا دانراوە زۆر ئاڵۆزە، "داوا دەکەین هاوشێوەی ناوچەکانی دیکەی عێراق خولی ئاسانمان بۆ بکەنەوە و پاشان داخلی تاقەکردنەوەکەمان بکەن".

 

لەلایەکی دیکەوە: مامۆستایەکی ئاینی کە بەشداربوو لە خۆپێشاندانەکە، هاوکات قوتابی خوێندنی باڵایە دەڵێ، "من لە حوجرە خوێندوومە و هیچ کات پێویستم بە زمانی ئینگلیزی نەبووە و لەسەر مینبەریش پێویستم پێی نابێ، من هەموو سەرچاوەکانم بە زمانی عەرەبییە".

 

باکگراوند: دوێنێ هەزار و 400 قوتابی ماستەر و دکتۆرا لە ڕێگەی نووسراوێکەوە داوایان لە ئاڤا کرد بە دواداچوون بۆ کێشەکەیان بکات و دەنگیان بگەیێنێت، ئەمڕۆش لەبەردەم وەزارەتی خوێندنی باڵا و توێژینەوەی زانستی گردبوونەوە و ناڕەزایەتییان دەربڕی.