سەرۆک بارزانی: بەشداریی بەرچاوی هاووڵاتییان لە هەڵبژاردن پاڵپشتییەکی گەورەیە

ئاڤا نیوز

 

ڕۆژی 11ـی تشرینی دووەمی 2024 سەرۆک مەسعود بارزانی، لە سەڵاحەددین پێشوازی لە بەڕێز پاتریک دۆریل باڵیۆزی فەڕەنسا لە عێراق کرد.

 

ڕاگەیێنراوی فەرمی: لە دیدارەکە دا کە یان برێم کونسوڵی گشتیی فەڕەنسا لە هەولێریش ئامادە بوو، باڵیۆزی فەڕەنسا لە عێراق پیرۆزبایی سەرکەوتنی هەڵبژاردنی پەرلەمانی کوردستانی لە سەرۆک بارزانی کرد، هاوکات پێزانینیشی بۆ ڕێژەی زۆری بەشداریی هاووڵاتییانی هەرێم لە کەشێکی ئارام و دیموکراسیانەی هەڵبژاردنی پەرلەمانی کوردستان لە ئۆکتۆبەری ڕابردوودا هەبوو.

 

لای خۆیەوە سەرۆک بارزانی بەشداریی بەرچاوی هاووڵاتییان و بەڕێوەچوونی سەرکەوتوانەی هەڵبژاردنی بە پاڵپشتێکی گەورە بۆ شەرعیەت و دامەزراوەکانی هەرێم لە قەڵەم دا و سوپاسی کۆمەڵگەی نێودەوڵەتیی و لایەنەکانیشی کرد بۆ چاودێریکردنی ئەو هەڵبژاردنە.

 

لەلایەکی دیکەوە: هەر لەو دیدارەدا هەڵسەنگاندن بۆ بارودۆخی سیاسیی عێراق و ناوچەکە و پەیوەندییەکانی نێوان هەولێر و بەغدا کرا و جەختیش لە پەیوەندیی و دۆستایەتیی نێوان گەلی کوردستان و گەلی فەڕەنسا کرایەوە.

 

لە بەشێکی تری ئەو دیدارەدا باڵیۆزی فەڕەنسا لە عێراق، سوپاسی سەرۆک بارزانی کرد بۆ بایەخدان و پاڵپشتیکردنی بەڕێوەچوونی ڕێوڕەسمی یادکردنەوەی سەد ساڵەی لەدایکبوونی خاتوو دانیال میتێران،  کە ڕۆژی 12ی تشرینی دووەمی 2024 لە شاری هەولێر بەڕێوە دەچێت.