13 کورد وەک باڵیۆزی نوێی عێراق دادەمەزرێن

ئاڤا نیوز

 

80 باڵیۆزی نوێ لە عێراق دادەمەزرێنرێن، بەلایەنی کەمەوە 13یان کورد دەبن، ئاڤا میدیا شێواز و مەرج و پێوەر و بنەماکانی دانانی ئەو باڵیۆزانە ئاشکرا دەکات.

 

وێنە گەوەرەکە: 15 ساڵە لە عێراق هیچ باڵیۆزێکی نوێ دانەنراوە، لە کاتێکدا حکومەتی عێراق بۆ پڕکردنەوەی ئەو بۆشاییەی لەو پلە وەزیفییە هەیەتی بە گشتی پێویستی بە زیاتر لە 140 باڵیۆز هەیە، هەم بۆ باڵیۆزخانەکان و هەمیش بۆ ئەو دامەزراوانەی پێویستیان بەوەیە لەلایەن ئەو باڵیۆزانەوە بەڕێوەببرێن. بۆ ئەم مەبەستەش حکومەتی عێراق لە سەروبەندی دانانی 80 باڵیۆزی نوێیە.

 

لێدوانی فەرمی: د.محەممەد سدیق، ئەندامی لیژنەی پەیوەندییەکانی دەرەوە لە پەرلەمانی عێراق بە ئاڤا نیوزی ڕاگەیاند: هێشتا ناوی ئەو باڵیۆزانە نەهێنراوەتە پەرلەمان، بەڵام لەسەر چۆنیەتی دابەشکردنی ئەو پشکانە لە نێوان لایەنەکان ڕێککەوتن کراوە.

 

ڕێككەوتنكە بەم شێوەیەیە: 50%ی لە کارمەندانی وەزارەتی دەرەوە دەبن و 50%ی دیکە لەنێو حیزبەکانەوە کاندید دەکرێن، بۆ ئەوەی ببنە باڵیۆز لە باڵیۆزخانەکانی عێراق لە وڵاتان.

 

شێوازی جێبەجێکردن: ئەو 50%ـەی لەناو وەزارەتی دەرەوە دەبنە باڵیۆز، لەسەر بنەمای لێهاتوویی دەبێت و پلەکانیان لە ڕاوێژکار و وەزیری ڕێپێدراوەوە بەرز دەکرێتەوە بۆ باڵیۆز.

 

بەپێی ڕێککەوتنی نێوان لایەنە سیاسییەکان، 50%ـەکەی دیکە، بەپێی ژمارەی کورسیی لایەنەکان دەبێت لە پەرلەمان، بۆ هەر 10 کورسییەک باڵیۆزێکیان دەبێت.

 

زانیاریی بەدەستهاتوو: لە وەزارەتی دەرەوەی عێراق ناوی 44 کاندید بۆ ئەنجوومەنی وەزیران بەرزکراوەتەوە بۆ ئەوەی بکرێنە باڵیۆز و لەو ژمارەیەش چەندین کوردی تێدایە.

 

زانیاریی تایبەت: بەپێی ئەو زانیارییانەی لە سەرچاوەی تایبەتەوە دەست ئاڤا نیوز کەوتووە، لەو 44 کاندیدە حەوتیان کوردن. بەپێی پشکی لایەنەکانیش بێت لە پەرلەمان، پارتی 3 باڵیۆز و یەکێتی 2 باڵیۆز و نەوەی نوێ باڵیۆزێکیان بەردەکەوێت لەو 50%ـەی لە نێو لایەنەکانەوە دەستنیشان دەکرێن بکرێنە باڵیۆز.