هەناردەکردنەوەی نەوتی کوردستان کلیلی چارەسەری کێشەی مووچەیە

ئاڤا نیوز

 

حكومەتی هەرێمی كوردستان بەغدا تۆمەتبار دەكات بە نەناردنی مووچە و پەسەند نەکردنی یاسا سێ ساڵییەکەی بودجەی فیدراڵی، بەغداش وەک هەمیشە هەرجارە و بە پاساوێک سەرجەم ڕێککەوتنەکانی پەیوەست بەم بابەتە  پەک دەخات. 

وێنە گەورەکە: كۆبوونەوەکانی پەیوەست بە مووچەی فەرمانبەران و بودجەی هەرێمی کوردستان بەردەوامن، جارێک لە بەغدا و جارێکی دیکە لە هەولێر، چەندین ڕێککەوتن و دانوستانیان لەسەر کراوە بەڵام جێبەجێ ناکرێن،   هۆکارەکەیشی وەک لە یاسای بودجەدا هاتووە ڕوون و ئاشکرایە. 

ئەوەی پێویستە بیزانیت: مانگی چواری ئەمساڵ هەردوو ئەنجوومەنی ئابووریی هەرێمی کوردستان و عێراق لە هەولێر ڕێککەوتن تا کۆتایی ئەمساڵ وەزارەتی دارایی هەرێمی کوردستان سەرجەم گرفتە تەکنیکییەکانی لیستی مووچە چارەسەر بکات، بەگویرەی بەدواداچوونی لیژنەی دارایی پەرلەمانی عێراق، زۆربەیان چارەسەرکراون و حکومەتی هەرێمی کوردستان هیچ گرفتی نییە. 

چارەسەر: بە بڕوای زۆربەی ئەندامانی لیژنەی دارایی پەرلەمانی عێراق، هەناردەکردنەوەی نەوتی هەرێمی کوردستان لە ڕێگەی بەندەری جەیهانەوە کلیلی چارەسەری کێشە دارایییەکانی نێوان بەغدا و هەولێرە.