ڕاگەیێنراوی کۆبوونەوەی حیزبە کوردستانییەکانی کەرکووک لەبارەی سەرژمێری گشتی

ئاڤا نیوز

 

حیزبە کوردستانییەکان لەبارەگای لقی سێی پارتی دیموکراتی کوردستان لە کەرکووک کۆبوونەوە، هەڵوەستەیان لەسەر پرۆسەی سەرژمێری گشتیی، بڕیار و ڕاسپاردەکانی ئەنجوومەنی وەزیرانی حکومەتی فیدراڵی عێراق کرد.

 

چیرۆکی سەرەکی: ئەمڕۆ چوارشەممە لەسەر داوای مەکتەبی ڕێکخستنی پارێزگای کەرکووک-گەرمیانی پارتی، بە بەشداری د.شاخەوان عەبدوڵا، جێگری سەرۆکی ئەنجوومەنی نوێنەرانی عێراق و فەهمی بورهان، سەرۆکی دەستەی گشتی ناوچە کوردستانییەکانی دەرەوەی ئیدارەی هەرێم و د.سیروان محەممەد، بریکاری وەزیری پلاندانانی حکومەتی هەرێمی کوردستان، حیزبە کوردستانییەکان جەختیان لە بەڕێوەچوونی پڕۆسەیەکی پاک و بێگەرد لەو ناوچانە کردەوە.

 

ڕاگەیێنراوی فەرمی: حیزبە کوردستانییەکانی کەرکووک ڕایانگەیاند: هەوڵەکانی حکومەتی هەرێمی کوردستان و دامەزراوە تایبەتمەندەکانی تایبەت بە پرسی سەرژمێری گشتی بەرز دەنرخێنین و داوا دەکەین کاری زیاتر  بۆ سەرخستنی پرۆسەکە لە ناوچە کوردستانییەکانی دەرەوەی ئیدارەی هەرێمی کوردستان بکرێت.

 

لەلایەکی دیکەوە: حیزبە کوردستانییەکان داوا لە هاووڵاتیانی پارێزگای کەرکووک دەکەن، لە هەر شوێنێکن، پێویستە لە ڕۆژی سەرژمێری بگەڕێنەوە پارێزگای کەرکووک و بەشداری لە پرۆسەکە بکەن، جەختیش دەکەنەوە سەرژمێرییەکی پاک و بێگەرد بەپێی دەستور و یاسا بەرکارەکان و تەواوی بڕیارەکانی ئەنجوومەنی وەزیرانی عێراقی فیدراڵ تایبەت بە پرۆسەی سەرژمێری لە ناوچە کوردستانییەکانی دەرەوەی ئیدارەی هەرێم وەک خۆی بکرێت.