پێشەوا هەورامانی ناوەڕۆکی کۆبوونەوەکەی سەرۆکوەزیران مەسرور بارزانی و سوودانی ئاشکرا دەکات

ئاڤا نوز

 

پێشەوا هەورامانی، گوتەبێژی حكومەتی هەرێمی كوردستان ناوەڕۆكی گفتوگۆی ئەمڕۆی نێوان سەرۆكوەزیران مەسرور بارزانی و محەممەد شیاع سوودانی، سەرۆكوەزیرانی عێراق سەبارەت بە پێكهێنانی كابینەی 10ـی حكومەت و پرۆسەی سەرژمێریی گشتیی ئاشكرا دەكات.

 

لێدوانی فەرمی: پێشەوا هەورامانی، گوتەبێژی حكومەتی هەرێمی كوردستان لە گەشتیی هەواڵەکانی کاتژمێر 7ـی ئاڤا ڕاگەیاند: لەمیانی كۆبوونەوەی ئەمڕۆ لەگەڵ سەرۆكوەزیران مەسرور بارزانی، سەرۆكوەزیرانی عێراق گوتی، "پێمان خۆشە كابینەی نوێی حكومەتی هەرێمی كوردستان بەزوویی پێكبهێنرێت، چونكە سەقامگیریی هەرێمی كوردستان ڕاستەوخۆ پەیوەندیی بە سەقامگیریی عێراقەوە هەیە، هاوکات دووپاتی كردەوە كە هەموو پاڵپشتییەكی حكومەتی هەرێمی كوردستان دەكات.

 

لەلایەكی دیكەوە: لەبارەی ئامانجی سەردانەکەی سوودانی بۆ هەرێمی کوردستان و کۆبوونەوەی لەگەڵ لایەنە سیاسییەکان، بەپێی گوتەی پێشەوا هەورامانی، سوودانی لە کۆبوونەوەکانیدا ئامانجی بوو داوا لە لایەنە سیاسییەکان بکات لۆژیكیانە داواكارییەكان سەبارەت بە پرسی پێكهێنانی حكومەت بخەنە ڕوو.

 

زانیاریی زیاتر: لە بەشێکی دیکەی کۆبوونەوەکەی نێوان سەرۆکوەزیران مەسرور بارزانی و سوودانی، "سەرۆکوەزیران مەسرور بارزانی  سوپاسی سەرۆكوەزیرانی عێراقی كرد بەهۆی ئەوەی تێبینییەكانی هەرێمی كورستان لەمەر سەرژمێریی لە ناوچە كوردستانییەكانی دەرەوەی ئیدارەی هەرێم بەهەند وەرگیراوە".

 

ئەوەش بزانە: بە گوتەی هەورامانی "ئەگەر ئەو تێبینیانەی هەرێمی كوردستان لەبارەی سەرژمێری ڕەچاو نەكرابوایە، كێشەی زۆر گەورە دروست دەبوو".