پێنج جار سزای هەتاهەتایی بەسەر بكوژانی خانەوادەكەی دهۆك سەپێنرا

ئاڤا نیوز

 

دادگای مێردین پێنج جار سزای زیندانیی هەتاهەتایی بۆ دوو بکوژی خانەوادەکەی دهۆک دەرکرد و کەسوکاری کوژراوانیش  بە سزاکە ڕازی نین.

 

وێنە گەورەكە: ڕۆژی پێنجشەممە 2024/11/14 دادگاییکردنی تۆمەتبارانی كەیسی كوشتنی خانەوادەكەی شاری دهۆك لە دادگای تاوانەكانی مێردین لە باكووری كوردستان بەكۆتاهات و دادگا بڕیاریدا بە زیندانیكردنی هەتاهەتایی بۆ دوو تاوانباری دۆسیەكە بە ناوەكانی فاریس ئەكسێڤن و عەبدوڵڵا كاپلان.

لێدوانی فەرمی: كەسێکی خانەوادەی کوژراوەکانی دهۆك، بە ئاڤا نیوزی ڕاگەیاند: ئاگاداری ئەو بڕیارەی ئەمڕۆی "دادگای مێردین"ـن، بەڵام بە بڕیارەكە ڕازی نین و چاوەڕوانی بڕیاری لەسێدارەدانی سەرجەم بكوژانی ئەو كەیسە بوون.

 

زانیاریی زیاتر: كەسوكاری خانەوادەی کوژراوەکانی دهۆك، كە لە بەشێكی زۆری پرۆسەی دادبینیكردنی تۆمەتباران لە دادگای مێردین ئامادە دەبوون.

لەلایەکی دیکەوە: کەسوکاری کوژراوەکانی دهۆک بۆ دەزگاكانی ڕاگەیاندن ڕایانگەیاند: داوادەكەین تەواوی تۆمەتبارانی ئەم كەیسە سزابدرێن، ئەوەش ئاشكرا بكرێت كە كێ لەپشت ئەو كردە تاوانكارییەوە بووە.

باكگراوند: ڕۆژی 19-01-2023، لەسەر ڕێگەی سەرەكی نوسێبین-مێردین لە باكووری كوردستان، پێنج هاووڵاتیی خانەوادەیەكی شاری دهۆك كە بەمەبەستی وەرگرتنی چارەسەری نەخۆشی لە باشووری كوردستانەوە چووبوونە باكوور، لەنێو ئۆتۆمبێلەكەیان لەلایەن چەند كەسێكەوە شەهیدكران.