چیرۆکی دوورخستنەوەی سێ ئەفسەر لە فڕۆکەخانەی کەرکووک بەهۆی تیکتۆکەوە

ئاڤا نیوز

 

وەزارەتی ناوخۆی عێراق بڕیاری قەدەغەکردنی بەکارهێنانی مۆبایل و تۆڕە کۆمەڵایەتییەکانی لە کاتی ئەرکدا بۆ ئەفسەران دەرکردووە.

 

چیڕۆکی سەرەکی: دوو ڕۆژ لەدوای دەرکردنی بڕیارەکە، لە کاتی ئەرک دا ئەفسەرێک بە پلەی عەمید و خانمێک بە پلەی نەقیب و ئەفسەرێکی دیکە بە پلەی ملازمی یەکەم کە لە بەشی پشکنینی فڕۆکەخانەی کەرکووک کاریان کردووە، وێنەیەک دەگرن، دواتر لە تۆڕی کۆمەڵایەتیی تیکتۆک بە ڤیدیۆ بڵاو دەکرێتەوە و گۆرانیەکی عەرەبی لەسەر دادەنرێت، ڤیدیۆکە دەگەیێنرێتە وەزیری ناوخۆی عێراق و بڕیاری گواستنەوە بۆ ئەو ئەفسەرانە دەردەچێت.

 

لێدوانی فەرمی: سەرچاوەیەک لە پۆلیسی فڕۆکەخانەی کەرکووک کە نەیویست ناوی ئاشکرا بکرێت بە ئاڤای ڕاگەیاند، کەسێکی نزیکی ئەفسەرەکان وێنەکەی گرتووە و لە تیکتۆک بڵاویکردووەتەوە، دواتر لەلایەن وەزارەتی ناوخۆی عێراق پەڕاوی لێکۆلینەوە لەسەر ئەم بابەتە دەکرێتەوە و بڕیار دەدرێت کە دوو ئەفسەرە پیاوەکە بۆ سەر سنوور بگوازرێنەوە، ئەفسەرە ئافرەتەکەش دەگوازرێتەوە بۆ بەڕێوەبەرایەتی پاسپۆرتی کەرکووک.

 

ئەمەش بزانە: ئەفسەرە سزا دراوەکان لە بەشی پشکنینی فڕۆکەخانەی کەرکووک کاریان کردووە، ئاڤا زانیویەتی دوویان عەرەبن و یەکێکیان کوردە.