بانکی ناوەندی ئامادەسازی پێشوەختە دەکات بۆ ئەگەری بەرزبوونەوەی زیاتر بەهای دۆلار

دلێر حەمە

 

دوای دووبارە هەڵبژاردنەوەی دۆناڵد ترەمپ وەک سەرۆکی ئەمریکا و لە ترسی گرتنەبەری سیاسەتێکی نوێی دارایی، بانکی ناوەندی عێراق لەهەوڵی گرتنەبەری ڕێکاری پێشوەختە دایە لە ئەگەری بەرزبوونەوەی بەهای دۆلار و داشکانی نرخی دینار.

 

وێنە گەورەکە: پێشبینی دەکرێت ترەمپ کۆمەڵێک ڕێکار و بڕیار بخاتە کار زیان بە ئابووری عێراق بگەیەنێت و فشارەکانی سەر دیناری عێراقی و دابینکردنی دۆلار تووندتر بکات.

 

لێدوانی فەرمی: مەحمود داغر، ڕاوێژکارێکی بانکی ناوەندی عێراق بە ئاڤا نیوزی گوت: سەرکەوتنی ترەمپ بۆ سەرۆکایەتیی ئەمریکا، کاریگەریی لەسەر نرخی دۆلار لە عێراق نییە، چونکە هەردوو دامەزراوەی گەنجینەی و بانکی فیدراڵی ئەمریکا بەرپرسن لە پرسی دراو نەک سەرۆکی ئەو وڵاتە.

 

زانیاریی بەدەستهاتوو: ئێستا گفتوگۆیەکی چڕ لەناو بانکی ناوەندی عێراق دەستیپێکردووە، بۆ گرتنەبەری ڕێکاری پێشوەختە لە ئەگەری بەرزبوونەوەی بەهای دۆلار و داشکانی نرخی دینار لە دوای دەستبەکار بوونی ترەمپ لە کۆشکی سپی .