مقاوەمەی عێراق لە ڕێگەی درۆنەوە هێرش دەکاتەوە سەر ئیسرائیل

ئاڤا نیوز 

هێرشەکانی بەرەی مقاوەمەی ئیسلامی لە عێراق لە ڕێگەی فڕۆکەی بێفڕۆکەوانەوە بۆ سەر پێگەکانی ئیسرائیل بەردەوامە و تاوەکو دێت ژمارەی هێرشەکانی زیاتر دەکات.

 

وێنە گەورەکە: لەوەتەی هەڵگیرسانی شەڕی نێوان ئیسرائیل لەگەڵ حەماس و حیزبوڵڵا، هێرشی گرووپە چەکدارەکانی عێراقەوە بۆ سەر ئیسرائیل بەردەوامە، ئەگەرچی چەندجارێک ئەمریکا هۆشداری بە عێراق داوە بۆ ئەوەی کۆنترۆڵی ئەو گرووپانە بکات، بەڵام تاوەکو ئێستا دەسەڵاتدارانی عێراق نەیتوانیوە کۆنترۆڵی ئەو گرووپە چەکدارانە بکەن.

 

ڕاگەیێنراوی فەرمی: بەرەی مقاوەمەی ئیسلامی لە عێراق ڕایگەیاند: بەرەبەیانی ڕۆژی 16-11-2024 لە ڕێگەی دوو درۆنەوە چەند ئامانجێکی گرنگیان لە ناوچەی ئوم ڕەشراش "ئایلات" کردووە ئامانج و جەخت لە بەردەوامی هێرشەکانیانیشان بۆسەر پێگەکانی ئیسرائیل دەکەنەوە.

 

کاریگەری و لێکەوتەکان: بەهۆی بەردەوامی هێرشی گرووپە چەکدارەکانی عێراق لە سەرەتای ئەم مانگە ئەنتۆنی بلینکن، وەزیری دەرەوەی ئەمریکا  لە پەیوەندییەکی تەلەفۆنیدا داوای لە محەممەد شیاع سوودانی، سەرۆکوەزیرانی عێراق کرد کۆنترۆڵی گرووپە چەکدارەکان بکات لە بەکارهێنانی خاکی عێراق بۆ هێرشکردنە سەر ئیسرائیل و هێزەکانی ئەمریکا لە ناوچەکە.