دادگەی فیدراڵی چارەنووسی موڵکەکانی پێشتری وەزارەتی بەرگری یەکلایی دەکاتەوە

ئاڤا نیوز

 

دادگەی فیدراڵیی عێراق بڕیاریدا سەرجەم ئەو موڵکانەی وەزارەتی بەرگری عێراق بگێڕێتەوە بۆ وەزارەتەکە، کە پێشتر و لەدوای ڕووخانی ڕژێمی بەعس، حکومەتی کاتی عێراق بە سەرۆکایەتیی پۆڵ بریمەر ئەو موڵکانەی خستبووە سەر وەزارەتی دارایی.

 

وێنە گەورەکە: دادگەی باڵای فیدراڵیی عێراق، لە نووسراوێکدا کە لە 29-10-2024 وەڵامی سکاڵایەکی وەزیری بەرگریی عێراقی لە دژی سەرۆکی پەرلەمان دایەوە، سەبارەت بە گەڕانەوەی هەموو ئەو موڵکانەی وەزارەتی بەرگری عێراق، کە پێش ساڵی 2003 بەناوی وەزارەتەکەوە بوون، دەستی بەسەرداگیرا و لەو وەزارەتە سەندراونەوە.

 

نووسراوی فەرمی: دادگەی باڵای فیدراڵیی ڕایگەیاندووە، بڕیاردراوە هەموو ئەو موڵکانەی وەزارەتی بەرگریی عێراق کە پێشتر هەیبوو بگەڕێنێتەوە بۆ وەزارەتەکە، بڕیاری لێسەندنەوەی موڵکەکانی وەزارەتەکەش بە نا دەستووری و نا یاسایی ناو دەبات.

 

ئەوەی پێویستە بیزانیت: دوای ڕووخانی ڕژێمی بەعس لە ساڵی 2003، حکومەتی کاتیی عێراق بە سەرۆکایەتیی ئەمریکا بڕیاریدا هێزە ئەمنییەکان و سوپای عێراق هەڵبوەشێنێتەوە و هەموو موڵکەکانی وەزارەتی بەرگریی عێراق ڕادەستی وەزارەتی دارایی کران، لەو کاتەوە وەزارەتی بەرگری بەشێکی زۆری موڵکەکانی لەدەستداوە.

 

ئەمەش بزانە: بەپێی بڕیارەکە وەزارەتی بەرگریی عێراق، دەتوانێت داوای سەرجەم موڵکەکانی لە هەموو ناوچەکانی عێراق و هەرێمی کوردستان بکاتەوە کە پێش ساڵی 2003 بەناوی ئەو وەزارەتەوە بوون.