سەرمایەی وەبەرهێنەرانی بیانی لە هەرێمی کوردستان زیاتر لە 11 ملیار دۆلارە

ئاڤا نیوز

 

سەرمایەی وەبەرهێنەرانی بیانی لە هەرێمی کوردستان زیاتر لە 11 ملیار دۆلارە و ئیمارات زۆرترین سەرمایەی وەبەرهێنانی لەسەر ئاستی وڵاتانی جیهان لە هەرێمی کوردستان بەگەڕ خستووە.

 

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنانی حکومەتی هەرێمی کوردستان بە ئاڤا نیوزی ڕاگەیاند: زیاتر لە 50 پرۆژەی وەبەرهێنانی بیانی بە گوژمەی زیاتر لە 11 ملیار دۆلار مۆڵەتی کارکردنیان لە هەرێمی کوردستان هەیە و پرۆژەکان لە سێکتەرە جیاوازەکاندا ئەنجام دراون.

 

ژمارەکان وا دەڵێن: وتەبێژی دەستەی وەبەرهێنانی حکومەتی هەرێمی کوردستان ئاماژە بە زۆرترین سەرمایەی بەگەڕخراو لە هەرێمی کوردستان دەدات و ژمارەکان بەم شێوەیەن.

 

سەرمایەی پرۆژەکانی وەبەرهێنانی وڵاتان لە هەرێمی کوردستان:

پلەی یەکەم: وڵاتی ئیمارات، سێ پرۆژەی گەورەی هەیە، سەرمایەی پرۆژەکانی دوو ملیار و 500 هەزار دۆلارە.

پلەی دووەم: تورکیا 17 پرۆژەی وەبەرهێنانی هەیە کە سەرمایەکەی نزیکەی ملیارێک و 500 هەزار دۆلارە.

پلەی سێیەم: لوبنان 10 پرۆژەی هەیە کە سەرمایەکەی زیاترە لە یەک ملیار دۆلار.

پلەی چوارەم: ئەمریکا چوار پرۆژەی وەبەرهێنانی لە هەرێمی کوردستان هەیە کە سەرمایەکەیان زیاترە لە 120 ملیۆن دۆلار.

 

ئەوەی پێویستە بیزانیت: هاوکات وڵاتانی وەک "جۆرجیا، میسر، ئێران، نیوزلەندا، کوەیت، فەرەنسا، چین، سوید، بەریتانیا، ئێران، ئەڵمانیا" زیاتر لە شەش ملیار دۆلار پرۆژەی وەبەرهێنانیان لە هەرێمی کوردستان هەیە.