وەزارەتی خوێندنی باڵا پێنج بڕیاری نوێ دەردەکات

ئاڤا نیوز

 

وەزارەتی خوێندنی باڵا و توێژینەوەی زانستیی حكومەتی هەرێمی كوردستان، وردەكاریی كردنەوەی زانكۆیەكی پزیشكی لە سلێمانی و كۆلێژێكی پزیشكی لە زانكۆی سەڵاحەدین بڵاودەكاتەوە.

 

وێنە گەورەكە: ئەمڕۆ دووشەممە 18-11-2024، ئەنجوومەنی وەزارەتی خوێندنی باڵا بە ئامادەبوونی وەزیر و بریكاری وەزیر و سەرجەم زانكۆ حكومییەكانی هەرێمی كوردستان كۆبووەوە و چەند بڕیارێكی دا.

 

ڕاگەیێنراوی فەرمی: وەزارەتی خوێندنی باڵا ڕایگەیاند، لەبارەی توانستی زمانی ئینگلیزی، کردنەوەی کۆلێژ و زانکۆی نوێ، کردنەوەی ڕاوندێکی نوێی ماستەر و دکتۆرا، ئامادەکردنی ڕەشنووسێکی نوێ بۆ زانکۆکان و  داشکاندنی کرێی خوێندن بڕیاری داوە.

یەکەم: بڕیار درا بە ڕاسپاردنى لایەنە پەیوەندیدارەکان بە ئامادەکردنى پرۆپۆزەلى کردنەوەى زانکۆیەکى تایبەتمەند بە بوارى پزیشکى لە شارى سلێمانى، بە هۆى پێویستیى زۆرى ناوچەکە و هەرێمى کوردستان بە کادرى تەندروستى و پزیشکى لێهاتوو بە کوالێتیى بەرزى خوێندن. هاوكات ئامادەکردنى پرۆپۆزەڵى کردنەوەى کۆلێژى پزیشکى لە زانکۆى سەڵاحەدین - هەولێر.

 

دووەم: ئەنجوومەنی وەزارەتی خوێندنی باڵا بڕیارشی دا بە پێکهێنانى لیژنەیەک بەمەبەستى ئامادەکردن و نووسینەوەى پرۆژەى ڕەشنووسى سەربەخۆیى زانستى و کارگێرى و دارایی و یاسایی زانکۆکانى کوردستان، بەو ئامانجەى زانکۆکانى کوردستان لە چوارچێوەى ئەم پرۆژەیەدا دەرفەتى زیاترى گەشەسەندن و پەرەپێدانى تواناکانیان هەبێت لە گشت بوارەکاندا.

 

سێیەم: سەبارەت بە کردنەوەى ڕاوندێکى نوێى خوێندنى باڵا (ماستەر، دکتۆرا) لە زانکۆ حکومییەکانى هەرێمى کوردستان، زانکۆکانى کوردستان ڕاسپێردران ساڵانە بەپێى خشتە و کاتى دیاریکراو خوێندنى باڵا (ماستەر، دکتۆرا) بەپێى پێویست بکەنەوە، سەبارەت بە ڕاوندى داهاتووش بۆ ئەو زانکۆیانەى ستافى زانستییان هەیە و مەبەستیانە ڕاوندێکى دیکەى خوێندنى باڵا بکەنەوە، بەڵام تاکو ئێستا پلانیان نەناردووە، پێویستە لە نزیکترین کاتدا پلانەکانیان بۆ وەزارەت و لیژنەى ئامادەکردنى ڕێنماییەکانى خوێندنى باڵا بەرزبکەنەوە، بەمەبەستى کارکردن لەسەر پلانەکان بۆ کردنەوەى ڕاوندى نوێى خوێندنى باڵا. 

 

چوارەم: تایبەت بە پرسى تاقیکردنەوەکانى توانستى زمانى ئینگلیزیی خوێندکارانى خوێندنى باڵا، ئەنجوومەنى وەزارەت بڕیاریدا بە "خوێندکاران/ قوتابیانى خوێندنى ماستەر و دکتۆرا لە سەرجەم بەشەکانى کۆلێژەکان لە زانکۆ حکومییەکانى هەرێمى کوردستان ڕێگەیان پێدەدرێت بەبێ مەرجى توانستى زمانى ئینگلیزى تاوتوێى ماستەرنامە و تێزى دکتۆرا ئەنجام بدەن"، بەڵام لەلایەن زانکۆکان بڕوانامەیان پێ نابەخشرێت تاکو مەرجى توانستى زمانى ئینگلیزى بەپێى ڕێنماییەکانى پەیوەندیدار دەستەبەر دەکەن.

 

پێنجەم: هەر لە کۆبوونەوەی ئەنجوومەنی وەزارەتی خوێندنی باڵا بڕیاری ئەوە درا کە بڕیارى داشکانى (45%)ى کرێى خوێندن بۆ ئەمساڵیش بەردەوامی دەبێت.