بە بڕیاری ئەنجوومەنی وەزیرانی عێراق بانکە ئەهلییەکان دەتوانن پرۆسەی تەوتین بکەن

ئاڤا نیوز

 

بەپێی نووسراوێکی ئەمینداری گشتیی ئەنجوومەنی وەزیرانی عێراق، کە کۆپییەکی دەست ئاڤا کەوتووە بانکە ئەهلییەکان دەتوانن بەشداری لە پرۆسەی تەوتینکردنی مووچەخۆران بکەن، بڕیارە سێ بانکی ئەهلی دیکەش لە نێو پڕۆژەی هەژماری من زیاد ببن.

 

نووسراوی فەرمی: لەنووسراوێکدا کە واژۆی حەمید نەعیم، ئەمینداری گشتیی ئەنجوومەنی وەزیرانی عێراقی لەسەرە و تێیدا هاتووە، وەزارەتەکان پەیوەندییەکانیان پەرە پێبدەن لەگەڵ بانکە ئەهلییەکان بۆ جێبەجێکردنی چەند پرسێک لەوانە هەژماری بانکی بکەنەوە، هەموو جۆرە چەکێکی بانکی وەربگرن، بەردەوام بن بۆ هاوکاریکردن لە پرسی بەئەلیکترۆنیکردنی پارە دانان لە بانک و تەوتینکردنی مووچە.

 

لێدوانی فەرمی: تیمی هەژماری من بە ئاڤا نیوزی گوت، "پێشوازی لەو بڕیارەی محەممەد شیاع سوودانی دەکەن کە ئاماژە بە هاوکاریکردنی بانکە تایبەتەکان بۆ بابەتی بە بانکیکردنی مووچە دەکات و دوابەدوای ئەم نووسراوەش، تیمی هەژماری من کارەکانی خێرا دەکات بۆ ئەوەی سێ بانکی دیکەی ئەهلی لەپاڵ ئەو بانکە حکومی و ئەهلییانەی دیکە بێنە ناو پڕۆژەکە."

 

ئەوەی پێویستە بیزانیت: پێشتر تاوەکو مانگی دووی ئەمساڵ تەنیا هەریەک لە بانکەکانی ڕەشید، ڕافیدەین و تی بی ئای مافی ئەوەیان پێدرابوو تەوتینی مووچەخۆران بکەن، بەڵام ئەم هەنگاوە زیاتر بوار دەدات بە بانکە ئەهلییەکان بۆ تەوتینی مووچەخۆران