لەسەر هەڕەشەکانی ئیسرائیل سوودانی داوای کۆبوونەوەیەکی بەپەلەی ئاسایشی نیشتمانی دەکات

ئاڤا نیوز

 

سەرۆکوەزیرانی عێراق پەیامەکەی ئیسرائیل بۆ ئەنجوومەنی ئاسایشی نێودەوەڵەتیی وەک بیانووێک دەبینێت بۆ هێرشکردنە سەر عێراق، بۆ ئەو مەبەستە داوای کۆبوونەوەیەکی بە پەلەی ئەنجوومەنی وەزاری بۆ ئاسایشی نیشتمانی دەکات.

 

وێنە گەورەکە: ئیسرائیل نامەیەک بۆ ئەنجوومەنی ئاسایشی نێودەوڵەتی دەنێرێت و بۆ یەکەمجار ناوی هێزە چەکدارەکانی عێراق دەهێنێت و تۆمەتباریان دەکات بەوەی هێرشی کوشندەیان دژی ئیسرائیل ئەنجامداوە و بوونەتە هۆی کوژرانی سەربازەکانی.

 

پێدراوە ڕاستییەكان: سێشەممە 19-11-2024 ئەنجوومەنی وەزیرانی عێراق، بە سەرۆکایەتی محەممەد شیاع سودانی کۆبوونەوەی ئاسایی خۆی ئەنجامدا و لە کۆبوونەوەکە دوایین پێشهاتەکان تاوتوێکران.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: لە کۆبوونەوەکە سەرۆکوەزیران دووپاتی کردەوە کە ئەو پەیامەی ئیسرائیل بۆ ئەنجوومەنی ئاسایشی نێودەوڵەتی ناردووە، بیانوویەکە بۆ هێرشکردنە سەر عێراق، بەمەبەستی گەیشتن بە هەوڵە بەردەوامەکانی بۆ فراوانکردنی شەڕ لە ناوچەکەدا.

 

زانیاریی زیاتر: بەپێی ڕاگەیێنراوەکە، سوودانی ئەوەی دووپات کردەوە کە عێراق ئەو هەڕەشانە ڕەت دەکاتەوە، هاوکات بڕیاری شەڕ و ئاشتی لە دەستی دەوڵەتی عێراقدایە و هیچ لایەنێک بۆی نییە دەست بەسەر ئەو مافەدا بگرێت، ئاماژەی بەوەشدا عێراق چوونە ناو شەڕەکە ڕەتدەکاتەوە.

 

کاریگەریی و لێکەوتەکان: سەرۆکوەزیرانی عێراق لە کۆبوونەوەکە داوای کرد هەر ئەمڕۆ کۆبوونەوەیەکی بەپەلەی ئەنجوومەنی وەزارەی بۆ ئاسایشی نیشتمانی بکرێت، بۆ بەدواداچوون بۆ پێشهاتەکان و دووپاتکردنەوەی هەڵوێستی عێراق.