سیستانی داوای سەرژمێرییەکی  پاکوبێگەرد دەکات

ئاڤا نیوز

 

مەرجەعی باڵای شیعەکانی عێراق پشتیووانی خۆی بۆ بەڕێوەچوونی پرۆسەی سەرژمێریی دووپاتدەکاتەوە و دەڵێت، پێویستە پرۆسەکە بەشێوەیەکی یاسایی و پاکوبێگەرد بەڕێوەبچێت.

 

وێنە گەورەکە: ئەمڕۆ ڕۆژی چوارشەممە، قۆناغی دووەمی سەرژمێریی گشتیی دانیشتووان لە عێراق و هەرێمی کوردستان دەستیپێکرد و بەیانیش بەردەوام دەبێت، بەوهۆیەش 48 کاتژمێر قەدەغەی هاتووچۆی ڕاگەیێنراوە.

 

ڕاگەیێنراوی فەرمی: عەتەبەی حوسەینی کە پەیکەری بەڕێوەبردنی مەزاری ئیمامی حوسێنی کوڕی عەلی کوڕی ئەبی تاڵیبە لە کەربەلا، لە پەیامێکدا ڕایگەیاند، عەلی سیستانی، مەرجەعی باڵای شیعەکانی عێراق چەندین ساڵە داوای ئەنجامدانی پرۆسەی سەرژمێریی دەکات، بەجۆرێک لەسەر بنەمای ڕێکارە یاساییەکان و لە پرۆسەیەکی پاکوبێگەرددا بەڕێوەبچێت.

 

ئەوەی پێویستە بیزانیت: لەبەشێکی دیکەی پەیامەکەیدا، عەتەبەی حوسەینی گوتی، پرۆسەی سەرژمێریی هەنگاوێکی گرنگە بۆ دامەزراندنی ڕوانگەیەکی گشتگیر بۆ گەشەپێدان و دانانی پلان و بەرنامە بۆ داهاتوو، بەتایبەتیش کە ئەم سەرژمێرییە یەکەمجارە لە ساڵی 1997ەوە لە عێراق بەڕێوەدەچێت.