پووتین و سوودانی گفتوگۆ لەبارەی گرژییەکانی ڕۆژهەڵاتی ناوەڕاست دەکەن

ئاڤا نیوز

 

سەرۆککۆماری ڕووسیا پەیوەندی بە سەرۆکوەزیرانی عێراق دەکات و هەردوولا جەخت لەسەر گرنگی هەوڵی زیاتری وڵاتانی زلهێز دەکەنەوە بۆ کۆتاییهێنان بە شەڕ و فراواننەکردنی بە شێوەیەک کە هەڕەشە لە سەقامگیری ناوچەکە و جیهان بکات.

 

چیرۆکی سەرەکی: ڕۆژی پێنجشەممە 21-11-2024، ڤیلادیمێر پووتین، سەرۆککۆماری ڕووسیا پەیوەندیی تەلەفۆنی بە محەممەد شیاع سوودانی، سەرۆکوەزیرانی عێراقەوە کرد.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: لە میانی پەیوەندییە تەلەفۆنییەکەدا تاوتوێی پەیوەندییە هاوبەشەکانی نێوان عێراق و ڕووسیا کرا، هاوکات ڕێگاکانی پەرەپێدانیان بە شێوەیەک کە بەرژەوەندیی هاوبەشی نێوان هەردوو وڵاتی دۆست بەدی بهێنێت.

 

زانیاریی زیاتر: لە پەیوەندییەکەدا باس لە پێشهاتەکان و بارودۆخی ناوچەکە کرا و جەخت لەسەر گرنگی هەوڵی زیاتری وڵاتانی زلهێز کرایەوە بۆ کۆتاییهێنان بە شەڕ و فراواننەکردنی بە شێوەیەک کە هەڕەشە لە سەقامگیری ناوچەکە و جیهان بکات.

 

لەلایەکی دیکە: هەر لە میانی پەیوەندییە تەلەفۆنییەکەدا تیشک خرایە سەر پرسی وزە و گرنگی هەماهەنگی نێوان وڵاتانی پەیوەندیدار، لەناو ئۆپێک و گروپی ئۆپێک پڵەس، بە مەبەستی سەقامگیرکردنی نرخی نەوت و گاز لە چوارچێوەی هاوکێشەیەکدا کە گەرەنتی نرخی دادپەروەرانە بۆ هەناردەکاران و بەکاربەران بکات.

 

ئەوەی پێویستە بیزانیت: ئەوە پەیوەندییەی سەرۆککۆماری ڕووسیا لە کاتێکدایە، عێراق کەوتووەتە ژێر هەڕەشەی ئیسرائیل دوابەدوای ئەو سکاڵانامەیەی پێشکەشی ئەنجوومەنی ئاسایشی نێودەوڵەتی کردبوو دژ بە عێراق، کە تێیدا تۆمەتباری دەکات بە هێرشکردنە سەر ئیسرائیل.