کۆمیسیۆن: ڕەنگە سبەی ئەنجامی هەڵبژاردنەکانی کوردستان پەسند بکرێت

ئاڤا نیوز 

 

کۆمیسیۆنی باڵای هەڵبژاردنەکانی عێراق ڕایدەگەیێنێت، لە یەکەم کۆبوونەوەی ئەنجوومەنی کۆمیسیاران لەم هەفتەیە ئەنجامی هەڵبژاردنەکانی خولی شەشەمی پەرلەمانی کوردستان پەسند دەکرێت.

 

وێنە گەورەکە: دوای یەکلاکردنەوەی سەرجەم ئەو تانانەی لە هەڵبژاردنی خولی شەشەمی پەرلەمانی کوردستان درابوون، لەلایەن دەستەی دادوەریی هەڵبژاردنەوە ڕەتکرانەوە و لەسەر کۆمیسیۆن پێویستە ئەنجامە فەرمییەکانی هەڵبژاردنی پەرلەمانی کوردستان پەسەند بکات.

 

لێدوانی فەرمی: جومانە غەلای، گوتەبێژی کۆمیسیۆنی باڵای هەڵبژاردنەکانی عێراق بە ئاڤا نیوزی ڕاگەیاند: لە یەکەم کۆبوونەوەی ئەنجوومەنی کۆمیسیاران لەم هەفتەیە ئەنجامی هەڵبژاردنەکانی خولی شەشەمی پەرلەمانی کوردستان پەسند دەکرێت.

 

زانیاریی زیاتر: بە گوتەی جومانە غەلای، ڕەنگە سبەی کۆبوونەوەکە بکرێت و ئەنجامەکان پەسند بکرێت.

 

ئەوەی پێویستە بیزانیت: ڕۆژی 18-11-2024، دەستەی دادوەریی هەڵبژاردنەکانی عێراق سەرجەم ئەو تانانەی لە ئەنجامی هەڵبژاردنی خوولی شەشەمی پەرلەمان درابوون کە ژمارەیان 41 تانەبوو، بە ڕەتکردنەوە یەکلاییکردنەوە.