ئاسایشی نیشتمانیی عێراق: ئەمیری ویلایەتی کوردستانی داعشمان دەستگیر کرد

ئاڤا نیوز

 

دەزگای ئاسایشی نیشتمانیی عێراق پووچەڵکردنەوەی پلانێکی "تیرۆریستی مەترسیدار"ی لە کەرکووک ڕاگەیاند، لەگەڵ دەستگیرکردنی ئەمیرێکی کوردی داعش و حەوت چەکداری ڕێکخراوەکە.

لێدوانی ڕۆژنامەوانی: ئەرشەد حاکم، گوتەبێژی دەزگای ئاسایشی نیشتمانیی عێراق لە لێدوانێکی ڕۆژنامەوانیدا ڕایگەیاند: "لە ئۆپەراسیۆنێکی جۆری و پێشوەختەدا، بە پشتبەستن بە زانیاری هەواڵگری دروست، لە پارێزگای کەرکووک پیلانێکی تیرۆریستی مەترسیدار پووچەڵ کردەوە، کە مەبەست لێی کردنە ئامانجی شوێنە حکومییەکان و کەسایەتییە ئەمنییەکان بوو".

 

ئەوەی پێویستە بیزانیت: ئۆپەراسیۆنەکە بە هەماهەنگی لەگەڵ بەڕێوەبەرایەتیی گشتیی ئاسایشی هەرێمی کوردستان کراوە، حەوت چەکدار دەستگیر کراون لەنێویاندا کەسێک بە ناوی ئازاد شاخانی،  ئەمیری ویلایەتی کوردستان بووە لە ڕێکخراوی داعش.

 

زانیاریی زیاتر: لەکاتی هەڵکوتانە سەریان، شەڕ و پێکدادان لەنێوان هێزەکانی عێراق و چەکدارەکانی داعش دروست بووە، تیرۆریستێک دوای گەمارۆدانی خۆی تەقاندووەتەوە.

 

ئەمەش بزانە: بە وتەی ئەرشەد حاکم، لەم ماوەیە لە پارێزگای کەرکووک 50 ئەندامی داعش دەستگیرکراون و لە دادگا سزادراون، لەنێو سزاکاندا لەسێدارەدان و زیندانی هەتاهەتایی هەیە.