دادگای کارگێڕیی عێراق کۆبوونەوەی لەبارەی سکاڵاکەی تایبەت بە کەرکووک دواخست

ئاڤا نیوز

 

دادگای کارگێڕیی عێراق کۆبوونەوەیەکی خۆی دواخست، کە مەبەست لێی یەکلاکردنەوەی سکاڵای ژمارەیەک لایەن بوو کە دژی پێکهێنانی حکومەتی خۆجێی کەرکووک تۆماریان کردبوو. 

 

وێنە گەورەکە: ڕۆژی 10-08-2024، یەکێتی بە ئامادەبوونی ئەندامێکی کوتلەی بابلیۆن و سێ ئەندامی عەرەبی کۆبوونەوەیەکی لە هۆتێل ڕەشید ڕێکخست بۆ پێکهێنانی حکومەتی خۆجێی کەرکووک، بەڵام پارتی و بەرەی تورکمانی و هاوپەیمانیی عەرەبی به‌شداری كۆبوونه‌وه‌كه‌یان نەكرد و به‌ نایاساییان زانی. دوای ئەمەش بەشێک لەو لایەنانە سکاڵایان لە دادگای باڵای فیدراڵی و دادگەی کارگێری تۆمارکردووە.

 

زانیاریی پەیامنێر: بە گوێرەی ئەو زانیارییانەی دەروون مەلا ناجی، پەیامنێری ئاڤا لە بەغدا دەستی کەوتووە: دادگای کارگێڕی پێشتر یەکلاکردنەوەی سکاڵای دژی پێکهێنانی حکومەتی خۆجێی کەرکووک چەند جارێک دواخستووە، جارێکیان لە 16-10-2024 و جارێکیش 22ی هەمان مانگ بووە، ئەمڕۆش جارێکی دیکە کۆبوونەوەکەی دواخست.

 

ئەوەی پێویستە بزانیت: بڕیاربوو ئەمڕۆ دادگای کارگێریی عێراق کۆببێتەوە بۆ بڕیاردان لەسەر سکاڵای بەرەی تورکمانی و هاوپەیمانیی عەرەبی و بەشێک لە لایەنەکانی دیکە دژی پێکهێنانی حکومەتی خۆجێی کەرکووک، بەڵام یەکلاکردنەوەی پرسەکەی بۆ ڕۆژی 4ی مانگی داهاتوو دواخست.