قۆناغی سێیەمی سەرژمێریی دانیشتووان دەست پێدەکات

ئاڤا نیوز

 

قۆناغی سێیەمی سەرژمێریی گشتیی دانیشتووان لە سەرتاسەری عێراق دەستیپێکرد و تاوەکو 10ی مانگی داهاتوو بەردەوام دەبێت.

 

وێنە گەورەکە: لە 15 ئەم مانگەوە پشووی فەرمی بوو بۆ ئەو هاوڵاتییانەی خەڵکی ناوچەکانی سنووری ماددەی 140دەستوور بوون تاوەکو بتوانن بگەڕێنەوە بۆ ناوچەکانیان و لە سەرژمێری خۆیان تۆمار بکەن، هاوکات لە ڕۆژانی 20 و 21ی ئەم مانگە لە تەواوی عێراق قەدەغەی هاتووچۆی جێبەجێکرا، بەمەبەستی ئاسانکاری بۆ تیمەکانی دەستەی ئامار تاوەکو قۆناغی دووەمی سەرژمێری تەواو بکەن.  

 

ڕاگەیێنراوی فەرمی: زیا عەواد کازم، سەرۆکی دەستەی ئامار و سیستەمی زانیاریی جوگرافی لە وەزارەتی پلاندانانی عێراق ڕایگەیاند، قۆناغی سێیەم بریتی دەبێت لە زانینی تایبەتمەندیی گوزەرانی دانیشتووان لە بوارەکانی تەندروستی، نیشتەجێبوون، فێرکاری، خزمەتگوزاری، کار و ئاستەنگەکان. ئەم زانیارییانە گرنگییەکی زۆرییان هەیە بۆ گەشەپێدان و باشترکردنی ئاستی خزمەتگوزاری لە هەموو شار و شارۆچکە و گوندەکان.

 

باکگراوند: دوو قۆناغی یەکەمی سەرژمێریی گشتیی دانیشتووان لە عێراق و هەرێمی کوردستان بەڕێوەچوو و وەزارەتی پلاندانان ڕایگەیاند، ئەنجامی سەرەتایی سەرژمێری ئەم هەفتەیە بڵاو دەکرێتەوە.