کۆمکاری عەرەبی هەڕەشەکانی ئیسرائیل بۆ سەر عێراق شەرمەزار دەکات

ئاڤا نیوز

 

کۆمکاری عەرەبی هەوڵەکانی ئیسرائیل بۆ فراوانکردنی هەوڵە شەڕانگێزەکانی خۆی شەرمەزار دەکات و پشتیوانی خۆی بۆ عێراق دووپات دەکاتەوە، بە پێویستی دەزانێت ڕێوشوێنی خێرا بگیرێتەبەر بۆ ڕاگرتنی ئەو هەڵکشانە بەردەوامە.

 

وێنە گەورەکە: بەهۆی هێرشی گرووپە چەکدارەکانی عێراق، ئیسرائیل هەڕەشەی لێدان لەو گرووپانە لە خاکی عێراق دەکات، بۆ ئەو مەبەستەش سکاڵانامەیەکی پێشکەشی ئەنجوومەنی ئاسایشی نێودەوڵەتی کردووە، لە بەرامبەریشدا عێراق پەیامی هاوشێوەی ئاراستەی چوار لایەنی نێودەوڵەتی کردووە، تاوەکو ڕێگری لە ئیسرائیل بکرێت.

 

چیرۆکی سەرەکی: یەکشەممە 24-11-2024 ئەنجوومەنی کۆمکاری عەرەبی لەسەر ئاستی نوێنەرانی هەمیشەیی لەسەر داوای عێراق بۆ تاوتوێکردنی هەڕەشەکانی ئیسرائیل کۆبووەوە.

 

ڕاگەیێنراوی فەرمی: کۆمکاری عەرەبی لە ڕاگەیێنراوێکدا دوای کۆبوونەوەکە، هەوڵەکانی ئیسرائیلی بۆ فراوانکردنی هەوڵە شەڕانگێزەکانی خۆی شەرمەزار دەکات و پشتیوانی خۆی بۆ عێراق دووپات دەکاتەوە.

 

لەلایەکی دیکەوە: کۆمکاری عەرەبی لە بڕیارنامەیەکدا کە داوایەکی سکرتێری گشتیی کۆمکاری دەوڵەتانی عەرەبی لەخۆدەگرێت، بۆ ناردنی نامەیەک بۆ ئەمینداری گشتیی نەتەوە یەکگرتووەکان و سەرۆکی ئەنجوومەنی ئاسایش کە ڕەنگدانەوەی هەڵوێستی کۆمکارەکەیە بۆ پشتیوانی لە کۆماری عێراق و ڕەتکردنەوەی یەکجاری ئەو تۆمەتانەی کە لە نامەی وەزیری دەرەوەی ئیسرائیلدا هاتووە.

 

چارەسەرەكان: کۆمکاری عەرەبی بە پێویستی دەزانێت ڕێوشوێنی خێرا بگیرێتەبەر بۆ ڕاگرتنی ئەو هەڵکشانە بەردەوامەی لە ناوچەی ڕۆژهەڵاتی ناوەڕاست هەیە، لە پێناو پاراستنی ئاشتی و ئاسایشی نێودەوڵەتی.

 

ئەوەی پێویستە بیزانیت: ئیسرائیل نامەیەکی بۆ ئەنجوومەنی ئاسایشی نێودەوڵەتی ناردووە و گرووپە چەکدارەکانی عێراق تۆمەتبار دەکات بەوەی هێرشی کوشندەیان دژی ئیسرائیل ئەنجامداوە، هاوکات بە مافی خۆشی دەزانێت وەڵامی ئەو هەڕەشانە بداتەوە کە لە خاکی عێراقەوە دەکرێتە سەریان.