فوئاد حوسێن: دەبێت هەوڵەکان چڕ بکەینەوە بۆ ڕاگرتنی هێرشی دوژمنکارانە بۆ سەر عێراق

ئاڤا نیوز 

وەزیری دەرەوەی عێراق ڕایگەیاند، ئەرکی هەمووانە کارە دیپلۆماسییەکانی خۆمان زیاتر چڕ بکەینەوە بە ئاڕاستەی ڕاگرتنی هەر هێرشێکی دوژمنکارانە و هەر هەڕەشەیەک کە ڕووبەڕووی عێراق دەبێتەوە.

 

چیرۆکی سەرەکی: دووشەممە 25-11-2024، لە بەغدا هەشتەمین کۆنفڕانسی باڵیۆزانی عێراق بەناونیشانی "بەرەو دیپلۆماسییەکی کارا و فرەڕەهەند لە جیهانێکی گۆڕاودا" بەڕێوەدەچێت، کۆنفرانسەکە هاوکاتە لەگەڵ 100 ساڵەی دامەزراندنی وەزارەتی دەرەوەی عێراق و تێیدا هەڵسەنگاندن بۆ سیاسەتی دەرەوەی وڵاتەکە دەکرێت.

 

لێدوانی فەرمی: فوئاد حوسێن، وەزیری دەرەوەی عێراق گوتارێکی پێشکەش کرد باسی ئەو ئاستەنگیانەی کرد کە ڕووبەڕوویان دەبێتەوەو بە پێویستی زانی بە پانە بردنە بەر گفتوگۆ و چڕکردنەوەی کارە دیپلۆماسییەکان ڕووبەڕووی ئەو ئاستەنگانە ببنەوەو لە پەیوەندی بەردەوامیشدا بن.

 

ئەوەی ئێستا ڕوودەدات: بە گوتەی فوئاد حوسێن لەم ڕۆژانەدا ناوچەکە شەڕ و دوژمنکاری بەخۆیەوە دەبینێت، هێرشی دوژمنکارانە بۆ سەر گەلی فەڵەستین و لوبنان هەیە، پلانێکیش هەیە بۆ بەرفراونکردنی ئەو دوژمنکارییە و ئەو شەڕە بە ئاڕاستەی وڵاتانی دیکە. بۆیە بە ئەرکی خۆمانی دەبینین، ئەرکی ئێوەشە، ئەرکی هەمووانە کارە دیپلۆماسییەکانی خۆمان زیاتر چڕ بکەینەوە بە ئاراستەی ڕاگرتنی هەر هێرشێکی دوژمنکارانە و هەر هەڕەشەیەک و هێرشی دوژمنکارانە بۆ سەر عێراق.

 

بابەتە ستراتیژییەكان: وەزیری دەرەوەی عێراق بە پێویستی زانی، "لەگەڵ وڵاتانی دیکەی ناوچەکە هەوڵی ڕاگرتنی شەڕ بدەن، بۆیە ئەو مەترسییانە بوونیان هەیە و پێویستیمان بە هەوڵی چڕ و هاوبەش هەیە لەگەڵ پایتەختەکان و حکومەتەکان بە تایبەت حکومەتە کاریگەرەکان.