27ــەمین فێستیڤاڵی گەڵاوێژ دوادەخرێت

ئاڤا نیوز

 

دەستەی باڵای فێستیڤاڵی گەڵاوێژ لەسەر دواخستنی بیست و حەوتەمین فێستیڤاڵەکەیان ڕاگەیەێنراوێکی بڵاو کردەوە و دەشڵێن: بەرپرسیارێتی هیچ بۆنە‌ و چالاكیەك بەناوی گەڵاوێژەوە لە ئەستۆ ناگرن.

 

ڕاگەیێنراوی فەرمی: دوێنێ دووشەممە 25-11-2024 دەستەی باڵای فێستیڤاڵی گەڵاوێژ بە سەرپەرشتی مەلا بەختیار کۆبوونەوە و بڕیاریان لەسەر دواخستنی 27ــەمین فێستیڤاڵی گەڵاوێژ دا.

 

لێدوانی فەرمی: مەلا بەختیار لە کۆبوونەوەکەدا ڕایگەیاند: دۆخێكی ناهەموار بەسەر تەواوی تۆڕی ناوەندی ڕۆشنگەری چاودێردا هاتووە، كە بنكەی ڕووناكبیری گەلاوێژ، یەكێكە لە ئۆرگانەكانی ئەو تۆڕە، بەو هۆیەشەوە بارەگا و بەشێكی زۆر لە كەلوپەلەكانی گەلاوێژ دەستی بەسەردا گیراوە، هاوکات "بەرپرسیارێتی هیچ بۆنە‌و چالاكیەك لە ئەستۆ ناگرین كە بەبێ هیچ ماف و شەرعیەتێك بەناوی بنكەی گەلاوێژەوە ساز بکرێت".

 

ئەمەش بزانە: دەستەکە جەختی كردەوە لەوەی، گشت نووسەران و ڕووناكبیران، دۆستانی گەلاوێژ ئاگادار دەكەنەوە لەوە 27ەمین فێستیڤاڵی گەلاوێژ بە فەرمی دواخراوە، هاوکات لە ئایندەیەكی نزیكدا وادەی سازكردنی فێستیڤاڵەکە ئاشكرا دەكرێت و 27 ــەمین فێستیڤاڵ دەكرێت.

 

لەلایەکی دیکەوە: دەستەی باڵای فێستیڤاڵی گەڵاوێژ ئاماژەی بەوە کرد کە دەستبەرداری مافی یاسایی خۆیان نابن و ڕێچكەی یاسایی دەگرنەبەر بۆ پارێزگاری لە ناو و ناوبانگ و شكۆی بنكەکە و فێستیڤاڵی گەلاوێژ.

 

باکگراوند: ڕۆژی پێنجی ئەیلوولی ئەمساڵ، هێزیکی چەکداری کۆماندۆ چوونە سەر باڵەخانەی چاودێر لە سلێمانی و دەستیان بەسەر تەواوی کەلوپەلی ناو بیناکەدا گرت و ناوەندەکەشیان داخست، دوای ئەوە مەلا بەختیار گوتی: "پێنجی ڕەشی ئەیلوول سیاسەتێکی تازەیە، هەموو ئەوانەی ئۆپۆزیسیۆنن و ڕەخنەیان هەیە، بیر لە ئازادییەکی جوان و مافی ژن و حکومەتێکی هاوچەرخ دەکەنەوە لە سلێمانی، دەبێ لە خۆیان بترسن".