چین لەبارەی شەڕی بازرگانییەوە هۆشداریی دەداتە ترەمپ

ئاڤا نیوز 

 

چین هۆشداریی دەدات لەوەی "کەس لە شەڕی بازرگانی سەرناکەوێت"، ئەمەش دوای ئەوەی جارێکی تر ترەمپ وەکو سەرۆکی ئەمریکا هەڵبژێردرایەوە و بەڵێنیدا کە باجی گومرگی لەسەر بەرهەمە هەناردە کراوەکان بۆ ئەمریکا زیاد بکات.

 

وێنە گەورەکە: ئەم هەڵوێستەی چین دوای ئەوە دێت کە پێشتر سەرۆکی تازە هەڵبژێردراوی ئەمریکا ڕایگەیاندبوو، لەگەڵ دەستبەکاربوونی باجی گومرگی بە ڕێژەی 25٪ بەسەر هەناردەی بەرهەمەکانی مەکسیک و کەنەدادا دەسەپێنێت، هاوکات بە ڕێژەی 10٪ باجی گومرگی لەسەر هەناردەی بەرهەمە چینییەکان زیاد دەکات، ئەمەش بە بیانووی کەمكردنەوەی هاتنی لێشاوی کۆچبەرانی نایاسایی و کەمکردنەوەی بازرگانیکردن بە ماددە هۆشبەرەکان.

 

لێدوانی فەرمی: لیو بینگو، وتەبێژی باڵیۆزی چین لە واشنتن بۆ فرانس پرێس: چین پێی وایە هەماهەنگی ئابووری و بازرگانی نێوان چین و ئەمریکا سوودی بۆ هەردوولا دەبێت.

 

ئەوەی لە بارەیەوە دەگوترێت: بەشێک لەوانەی لە سەرۆکی تازە هەڵبژێردراوی ئەمریکاوە نزیکن پێیان وایە، زیادکردنی باج لەسەر بەرهەمە هاوردەکان چەکێکی بەهێزە بۆ ناچارکردنی وڵاتان بە پابەندبوون بە مەرجەکانی ئەمریکاوە لەبارەی بازرگانی هاوبەش.