لە ترسی هێرشی ئیسرائیل سەدر بارەگاکانی لە دیالە چۆڵ دەکات

ئاڤا نیوز

 

دوای زیادبوونی گرژییەکان و مەترسی هێرشەی ئیسرائیل، سەرایا سەلام، باڵی چەکداری ڕەوتی نیشتمانی شیعە بە بڕیاری موقتەدا سەدر سەرجەم بارەگاكانی لە پارێزگای دیالە دەگوازێتەوە دەرەوەی شار و داواش دەكات وێنە و پۆستەری بنەماڵەی سەدر لە هیچ شوێنێک دانەنێن.

 

وێنە گەورەكە: ڕۆژی 19-11-2024، وەزیری دەرەوەی ئیسرائیل داوای لە نەتەوە یەکگرتووەکان کرد، فشار بخاتە سەر عێراق بۆ ڕێگریکردن لە هێرشی گرووپە چەکدارەکان دژی ئیسرائیل و لایەنە سیاسی و چەکدارەکان ئەمەیان وەک هەڕەشە خوێندووەتەوە  چاوەڕوان دەکەن ئیسرائیل هێرش بکاتە سەر عێراق. 

 

ڕاگەیێنراوی فەرمی:  موقتەدا سەدر، رێبەری ڕەوتی نیشتمانی شیعە [رەوتی سەدر لە پێشوو]، داوای کردووە لەماوەی 40 ڕۆژدا سەرجەم بنكە سەربازییەكانی سەرایا سەلام لە دیالە  بۆ دەرەوەی شارەكان بگوازرێنەوە، بڕیارەکەش سەرجەم شار و شارۆچكەكانی پارێزگای دیالە جگە لە شاری سامەڕا دەگرێتەوە.

 

موقتەدا سەدر داواشیكردووە، بەهیچ جۆرێک پۆستەر و وێنەی خۆی و خانەوادەی سەدر لە شەقام و شوێنە گشتییەكان و دامودەزگا فەرمی و نافەرمییەكان هەڵنەواسرێت، كاروانی ئۆتۆمبێلی بەرپرسە سەربازییەكانی کەمبکرێنەوە و نابێت لە پێنج ئۆتۆمبێل زیاتربن.

 

لە لایەکی دیکەوە: قاسم ئەعرەجی، ڕاوێژکاریی ئاسایشی نیشتمانیی عێراق، ئەم هەنگاوەی سەدر بە باشی ناودەبات و دەڵێت، ئەمە وادەکات عێراق لەم شەڕە بە دووربخرێت. 

 

ئەوەی پێویستە بیزانیت: سەرایا سەلام هێزێكی چەكداری سەر بە حەشدی شەعبییە و لەژێر فەرمانی موقتەدا سەدر، ڕێبەری ڕەوتی سەدردا کاردەکەن، لەگەڵ سەرهەڵدانی داعش، سەرایا سەلام لە پارێزگاكانی دیالە و سەڵاحەددین، وەک بەشێک لە سیستمی بەرگری دروستبوون و بڵاوەیان پێکرا.