پزیشکێکی زانکۆی گەرمیان دوای دوورخستنەوەی لە بەریتانیا داهێنان دەکات

ئاڤا نیوز

 

پزیشکێکی زانکۆی گەرمیان دوای ئەوەی بە بیانووی نەمانی مۆڵەتی ساڵانە لە زانکۆ دوور دەخرێتەوە و لە بەریتانیا داهێنانێک دەکات. 

 

چیرۆکی سەرەکی: پزیشکێکی کورد بە ناوی حەسەن محەممەد ڕۆستەم، پسپۆڕی بواری بەرگری لەشە و مامۆستا بووە لە کۆلێژی پزیشکی زانکۆی گەرمیان، ساڵی 2019 لە بەریتانیا کۆمپانیایەک دەدۆزێتەوە و گرێبەستێکی چوار ساڵەی لەگەڵ دەکات، بۆ ئەوەی توێژینەوەیەکیان بۆ بکات لەسەر جگەری دەستکرد.

 

زانیاریی بەدەستهاتوو: د. حەسەن محەممەد بە ئاڤا نیوزی ڕاگەیاند، سەرەتا لە زانکۆی گەرمیان پێیان وتووە دەتوانیت بڕۆیت و هاوکاریت دەکەین، ساڵێک مۆڵەتی بێ مووچەی بۆ دەکەن، دوای هێنان و بردنێکی زۆر ساڵێکی دیکەش مۆڵەتی بێ مووچەی بۆ درێژ دەکەنەوە، بەڵام  دوای تەواوبوونی ئەم دوو ساڵە فەسڵی دەکەن، ئەویش گوێی پێنەداوە و نەگەڕاوەتەوە. 

 

زانیاریی زیاتر: د. حەسەن لە بەریتانیا دەرمانێکی داهێناوە بۆ جێگرەوەی 'ئەنتیبایۆتیک' دژی ئەو میکرۆبانەی کە بەرگرییان دژی دەرمان پەیدا کردووە. پزیکشەکە بۆ کۆمپانیاکەش بووەتە مایەی خێر، حکومەتی بەریتانیا بڕیاری داوە بڕی  یەک ملیۆن و 155 هەزار دۆلار بە کۆمپانیاکە ببەخشێت بۆ ئەوەی پەرەی زیاتری پێبدات.

 

قووڵتر: دەرمانی پزیشکە کوردەکە چەند قۆناغێکی ماوە و بڕیارە لە ساڵی داهاتوودا لەسەر مرۆڤ تاقی بکرێتەوە.

 

ئەوەش بزانە: بەپێی یاسا فەرمانبەر دەتوانێت پێنج ساڵ و مامۆستای زانکۆش دوو ساڵ مۆڵەتی بێ مووچە بکات.

 

باکگراوند: د.حەسەن محەممەد ژیانی هاوژینی پێکهێناوە و خاوەنی دوو کچ و دوو کوڕە، بە ئەسڵ خەڵکی قەزای کەلاری ناوەندی ئیدارەی گەرمیانە و ئێستا دانیشتووی بەریتانیایە.