ڕۆژنامەنووسێكی سلێمانی لەكاتی تازەكردنەوەی مۆڵەتی شۆفێری دەستگیر دەكرێت

ئاڤا نیوز

ڕۆژنامەنووسێكی شاری سلێمانی لەكاتی سەردانیكردنی بۆ بەڕێوەبەرایەتیی هاتووچۆی سلێمانی بۆ تازەكردنەوەی مۆڵەتی شۆفێرییەكەی، لەلایەن ئاسایشی سلێمانییەوە دەستگیر دەكرێت.

زانیاریی بەدەستهاتوو: كارزان تاریق، پەیامنێری كەناڵی ئێن ئاڕ تی لە شاری سلێمانی لە نیوەڕۆی ئەمڕۆوە لەلایەن ئاسایشی سلێمانییەوە دەستگیر كراوە و تاوەكو ئێستا ئازاد نەكراوە.

لێدوانی فەرمی: دەشنێ سەلیم، هاوژینی كارزان تاریق بە ئاڤا نیوزی ڕاگەیاند: هاوسەرەكەم لەسەر كەیسێكی ڕۆژنامەنووسی دەستگیر كراوە، ئەمڕۆ بەیەكەوە بووین لە بەڕێوەبەرایەتیی هاتووچۆی سلێمانی بەمەبەستی نوێكردنەوەی مۆڵەتی شۆفێری، هەر لەوێش دەستگیر كرا و تاوەكو ئێستاش ئازاد نەكراوە.

ڕاگەیێنراوی فەرمی: سەنتەری میترۆ بۆ داكۆكیكردن لە مافی ڕۆژنامەنووسان ڕایگەیاند: "ئەمڕۆ سێشەممە كارزان تاریق چووە بۆ تازەكردنەوەی مۆڵەتی شۆفێرییەكەی، لە بەشی كۆمپیوتەر لە بەڕێوەبەرایەتیی هاتووچۆی سلێمانی پێیان گوتووە فەرمانی دەستگیركردنت هەیە، لەوێ هێشتوویانەتەوە تا هێزێكی ئاسایش هاتووە، گواستوویانەتەوە بۆ ئاسایشی سلێمانی". 

زانیاریی زیاتر: سەنتەری میترۆ پەیوەندی بە ئاسایشی سلێمانییەوە كردووە و گوتوویانە كە ڕادەستی پۆلیسی دەكەن، پاشان گواستراوەتەوە بۆ بنکەی پۆلیسی ئەزمەڕ و تاوەكو ئێستا ئازاد نەكراوە.

لەلایەكی دیكەوە: سەنتەر میترۆ ڕاشیگەیاندووە: ئەم مامەڵەیە لەگەڵ ڕۆژنامەنووسان لە كەیسەكانی تایبەت بە كاری ڕۆژنامەنووسان و هێشتنەوەی لە گرتووخانەكان بۆ ماوەی چەند كاتژمێرێك ڕەتدەكەینەوە و دەبوو لەلای پۆلیس بووایە و بە كەفالەتی شوێنی كار ئازاد بكرایە.