عێراق بەشداریی لە شەشەمین کۆنگرەی عەرەبی تایبەت بە ئاو دەکات

ئاڤا نیوز 

 

بە بەشداری عێراق ئەمڕۆ لە نزیک دەریای مردووی ئوردن، شەشەمین کۆنگرەی عەرەبی تایبەت بە ئاو دەستیپێکرد و بەیانیش بەردەوام دەبێت، تیایدا گفتوگۆ لەسەر چۆنیەتی چارەسەرکردنی قەیرانی ئاو لە وڵاتانی عەرەبی دەکرێت.

 

وێنە گەورەکە: شەشەمین کۆنگرەی عەرەبی تایبەت بە ئاو ئەمساڵ لە ژێر ناونیشانی "حکومڕانییەکی چاک بۆ بەدیهێنانی گەشەپێدانی بەردەوام لە ئاو" دا بەڕێوەدەچێت، تیایدا جەختدەکرێتەوە لەسەر کاری پێکەوەیی لەئاستی وڵاتانی عەرەبی بۆ ڕووبەڕووبوونەوەی ئاستەنگییەکانی تایبەت بە ئاو،  گفتوگۆش لەسەر نوێترین گۆڕانکاریی و ئاستەنگییەکانی بەردەم بەڕێوەبردنی سەرچاوەکانی ئاو و چۆنییەتی پاراستن و بەردەوامبوونیان دەکرێت.

 

ئەوەی پێویستە بیزانیت: مەبەست لە حکومڕانی چاک بەڕێوەبردنێکی باشی ئاوە، چونکە وەک ڕێکخەرانی کۆنگرەکە دەڵێن، حکومڕانی چاک گەرەنتییە بۆ دابەشکردنی ئاو بەشێوەیەکی دادپەروەر و دانانی سنورێک بۆ قەیرانەکانی ئاو کە کاریگەری لەسەر ئاسایشی خۆراک، ئابووری و کۆمەڵایەتی وڵاتەکانیان هەبووە.

زانیاریی زیاتر: بەشێکی فراوانی جوگرافیای وڵاتانی عەرەبی بیابانە و سەرچاوەی ئاوی بەراورد بە ناوچەکانی دیکەی جیهان وەک پێویست نییە، جگە لەوەش 60 %ـی سەرچاوەکانی ئاو لە وڵاتانی عەرەبیدا، کەوتوونەتە خاکی وڵاتانی دیکەی ناعەرەبییەوە.