کامێراکانی خاڵ بۆ خاڵ لەڕێگای نێوان تاسڵوجە و چەمچەماڵ خرانە کار

ئاڤا نیوز

 

کامێراکانی تۆمارکردنی تیژڕەوی خاڵ بۆ خاڵ لە ڕێگەی نێوان تاسڵوجە - چەمچەماڵ خرانە کار و ئێستا سەرپێچی شۆفێران تۆمار دەکات.

 

وێنە گەورەکە: دوای ئەوەی 28 کامێرای تۆمارکردنی تیژڕەوی خاڵ بۆ خاڵ لە نێوان تاسڵوجە – چەمچەماڵ دانران و ماوەی سی ڕۆژ بە شێوەی تێست کاریان پێکرا، ئەمڕۆ چوارشەممە 27-11-2024 کارا دەکرێن و سەرپێچی ئۆتۆمبێلەکان تۆمار دەکەن.

 

ڕاگەیێنراوی فەرمی: بەڕێوەبەرایەتی هاتووچۆی سلێمانی ڕایگەیاند: دوای کاتژمێر 12ی نیوەڕۆ، کامێراکانی تۆمارکردنی تیژڕەوی خاڵ بۆ خاڵ، سەرپێچییەکان تۆمار دەکەن، هاوکات کامێراکان لە سەرەتای پردی تاسڵوجە تا کۆتایی بازگەی بانی مەقان دانراون.

 

ئەمەش بزانە: کامێراکان لەسەر خێرایی دیاریکراو جێگیر کراون، بە جۆرێک لە هەندێک شوێن لەسەر خێرایی 60 کیلۆمەتر لە کاتژمێریک دایە، هاوکات کۆتا خێرایی لە 80 کیلۆمەتر و 100 کیلۆمەتر دەبن لە کاتژمێرێکدا.

 

ئەوەی پێویستە بیزانیت: کامێراکان سیستەمی خاڵ بۆ خاڵ پەیڕەو دەکەن و ماوەیەی نێوان کامێراکان هەژمار دەکات، هاوکات سەرجەم کامێراکان بەستراونەتەوە بەیەکەوە و ژمارەیان 28 کامێرایە.