سوودانی: كار بۆ باشتركردنی پەیوەندییەكانمان لەگەڵ کابینەی داهاتووی ئەمریكا دەكەین

ئاڤا نیوز

 

سەرۆكوەزیرانی عێراق ڕایدەگەیەنێت، پەیوەندیێكی باشی لەگەڵ دۆناڵد ترەمپ هەیە و لەگەڵ دەستبەكاربوونی كابینەكەی، دەیانەوێت پەیوەندییەكانیان پەرەپێبدەن.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق، لەمیانی دیدارێكی لەگەڵ ڕۆژنامەی "ئیل مۆندۆ"ـی ئیسپانی ڕایگەیاند، "عێراق كار بۆ پەرەپێدانی پەیوەندییە نێودەوڵەتییەكانی لەسەرجەم بوارەكاندا كردووە و لەگەڵ ئەمریكاش ڕێككەوتنی ستراتیژیمان هەیە كە چەندین سێكتەر لەخۆی دەگرێت".

 

ئەوەی پێویستە بیزانیت: عێراق و ئەمریكا لەوەتەی ساڵی 2008ـەوە ڕێككەوتنامەی ستراتیژیی لەنێوانیان واژۆكراوە، كە چەندین بوار دەگرێتەوە، عێراق دەیەوێت پرسی مانەوە یان كشانەوەی هێزە سەربازییەكانی ئەمریكا لە چوارچێوەی ڕێككەوتنەكە، ڕێكبخاتەوە. 

 

لەلایەکی دیکەوە: سوودانی ئاماژەی بەوەكردووە، توانای هێزە ئەمنییەكانی عێراق لەئێستادا گەیشتووەتە ئاستێكی پێشكەوتوو، دۆخی وڵاتیش سەقامگیرە، بۆیە هیچ پاساوێك بۆ مانەوەی هێزەكانی هاوپەیمانی نێودەوڵەتی بۆ بەرەنگاربوونەوەی داعش لە عێراقدا نەماوە.