وتارێکی وەزیری دەرەوەی نەمسا لە ئاڤا نیوز

ئاڤا نیوز

 

ئەلێکساندەر شاڵێنبێرگ، وەزیری دەرەوەی نەمسا، وتارێکی لەبارەی کێشەکانی ڕۆژهەڵاتی ناوەڕاست نووسیوە و بۆ بەشێک لە میدیای ناوچەکە نێردراوە، کە یەکێک لەوانە ئاڤا نیوزە. باس لە کێشەکانی ڕۆژهەڵاتی ناوەڕاست، بەتایبەت کێشەی فەڵەستین و ئیسرائیل دەکات و دروستکردنی دوو دەوڵەت بە تاكە چارەسەری کێشەکان دەزانێت.

 

وێنە گەورەکە: نزیکەی پێنج مانگە شەڕی نوێی حەماس و ئیسرائیل بەردەوامە، ئەمەش دووبارە چاوی کۆمەڵگەی نێودەوڵەتی بۆ کێشەکانی ڕۆژهەڵاتی ناوەڕاست ڕاکێشاوەتەوە. هەمووان بەدوای چارەسەرێکدا دەگەڕێن بۆ ئەو شەڕەی کە لەو ماوەیەدا زیاتر لە 32 هەزار کەس لە هەردوولا کوژراون، کە 29 هەزاریان خەڵکی کەرتی غەززەن.   

 

هەڵوێستی فەرمی: وەزیری دەرەوەی نەمسا لە وتارەکەیدا هەڵوێستی وڵاتەکەی بەرامبەر هێرشی حەماس بۆ سەر ئیسرائیل دەخاتەڕوو و دەنووسێت: "یاسای نێودەوڵەتی بنەمای ڕێنیشاندەری سیاسەتی دەرەوەمانە. پێشێلکردنی یاسای نێودەوڵەتی، هەر کاتێک و لە هەر کوێیەکی ئەم جیهانە بێت، هێڵی سوورە. لەبەرئەمەشە کە ئێمە بێ دوودڵی هێرشە مووشەکییە بەردەوامەکانی حەماس، تۆنێلەکانی تیرۆر، بارمتەگرتن و بەکاربردنی کەسانی سڤیل وەک قەڵغانی مرۆیی، سەرکۆنە دەکەین. ئێمە لەگەڵ مافی بەرگری لەخۆکردنی ئیسرائیل لە ڕووبەڕووبوونەوەی تیرۆر بە بەهێزی وەستاوین".

 

لە لایەکی دیکەوە:  وەزیری دەرەوەی نەمسا داوا لە ئیسرائیل دەکات هەر هەنگاوێکی ڕێتێچووی زیاتر بۆ پاراستنی کەسانی سڤیلی بێتاوان بگرێتەبەر و ڕێگە بدات یارمەتیی زیاتر بچێتە ناو غەززە. دەشنووسێت "ئێمە بە توندی ئەو لێدوانانە ڕەتدەکەینەوە کە داوای جێگۆڕکێی فەلەستینییەکان دەکەن، ئێمە داوای مانەوەی فەلەستنییەکان دەکەین و داوای سزادانی نیشتەجێکراوە توندڕەو و توندتیژەکانیش دەکەین".

 

چارەسەر: ئەلێکساندەر شاڵێنبێرگ خۆشحاڵی خۆی دەردەبڕێت بەو گفتوگۆیانەی ئەم دواییە کە ئەمریکا، قەتەر و میسر پاڵپشتیی لێدەکەن و پێیوایە "ڕێککەوتنێک دەتوانێت ئامادەکاریی بکات بۆ ئاگربەستێک و سەرەنجامیش ببێتە دەروازەیەک بۆ ئاشتی". هاوکات پێیوایە "لەناوجەرگەی ئەو هەموو ترس و ئازارەدا، وا دەردەکەوێت کێشانی ڕێگایەک بەرەو ئاشتییەکی بەردەوام ئاسان نەبێ، بەڵام بە نیسبەت منەوە، هیچ جێگرەوەیەکی شایستە و هەمیشەیی نییە جگە لە دروستکردنی دوو دەوڵەت".